नवलपरासी । सुस्ता पश्चिमको बर्दघाट नगरपालिकाले पालिकाभित्र रहेका अपांगता भएका व्यक्तिलाई निःशुल्क स्वास्थ्य सेवा दिन थालेकाे छ ।
निःशुल्क उपचारका लागि पालिकाकाभित्रका २ वटा सामुदायिक अस्पतालमा व्यवस्था मिलाएको नगरप्रमुख शम्भुलाल श्रेष्ठले जानकारी दिए ।
‘अपांगता भएकाको स्वास्थ्योपचारलाई बनाउन निःशुल्क उपचारको सुरुआत गरेका छौं ।’ नगरप्रमुख श्रेष्ठले भने ।
नगर मातहतका अस्पतालले दिन भ्याउने सबै सेवा सुविधा निःशुल्क दिइनुका साथै अन्यत्र उपचार गर्न जानुपर्ने एम्बुलेन्स सेवासमेत छुट दिइने स्वास्थ्य शाखा प्रमुख माधव ज्ञवालीले जानकारी दिए ।
यो सुविधा साउनदेखि नै लागू गरिएको उनले जानकारी दिए । सामुदायिक अपांग सेवा केन्द्रका अध्यक्ष रमेश श्रेष्ठले अपांगता भएकालाई यसले थोरै भए पनि राहत पुर्याउने जनाउँदै नगरको निर्णय स्वागतयोग्य भएको बताए ।
निलो र सेतो परिचयपत्र भएका भत्ता नपाउने अपांगता भएकालाई नगरको यो निर्णयले विशेष राहत मिल्ने उनको भनाइ छ । नगरपालिकाभित्र ७७९ अपांगता भएका व्यक्तिमध्ये ४८७ जनाले परिचयपत्र लिएको नगरपालिकाले जनाएको छ ।
पालिका अब पूर्ण संस्थागत प्रसूति सेवायुक्त
सुनवल र बर्दघाट नगरपालिका पूर्ण संस्थागत प्रसूति सेवायुक्त नगरपालिकाका भएका छन् ।
जनस्वास्थ्य तथा पोषणमा समेटिएको ८८ सूचकमध्ये ४४ प्राथमिक स्वास्थ्य सेवामध्ये समग्रमा सुरक्षित मातृत्वतर्फ आवश्यक सूचक पूरा भएको तथ्यांकका आधारमा दुवै नगरपालिका पूर्ण संस्थागत प्रसूति सेवायुक्त भएका हुन् ।
बर्दघाटमा १६ वटै वडामा आधारभूत स्वास्थ्य केन्द्र र एउटा अस्पताल छ । बर्दघाट नगरप्रमुख श्रेष्ठले केही वर्षभित्रमै सबै आधारभूत स्वास्थ्य केन्द्रमा ‘बर्थिङ सेन्टर’को स्थापना र नगरवासीलाई प्रभावकारी स्वास्थ्य सेवाको पहुँचमा पुर्याउने बताए ।
सुनवल नगरप्रमुख विमला अर्यालले सुनवल नगरपालिकाले ‘बार्थिड सेन्टर’ स्थापना गरेको र गर्भवतीलाई निःशुल्क एम्बुलेन्स सेवा प्रदान गरिएको बताइन् ।
पालिकाका १३ वटै वडाबाट आधारभूत स्वास्थ्य सस्थाबाट गर्भवतीलाई गर्भावस्थादेखि नै जाँचमा विशेष सहयोग गरिदै आएको छ ।
