काठमाडौँ । ताप्लेजुङ जिल्लाको फुङलिङ नगरपालिकाले आफ्नो नगर क्षेत्रका सबै व्यवसायलाई नगरपालिकामा दर्ता हुन भनेको छ ।
नगरपालिकाले एक सार्वजनिक सुचना प्रकाशित गरी दर्ता हुन भनेको हो । साउन ५ गते नगरपालिकाले प्रकाशित गरेको सार्वजनिक सुचनामा सो मितिले ४५ दिनभित्र (करिब भदौ २० गते) दर्ता भइसक्न भनेको छ ।
नेपालको संविधान अनुसार स्थानीय तहमा दर्ता हुनुपर्ने उद्यम व्यवसाय पनि दर्ता नभएको कारण ४५ दिनको म्याद दिएर सार्वजनिक सुचना प्रकाशित गरिएको मेयर अमिर मादेनले जानकारी दिए ।
‘संविधान र कानुनले तोकेअनुसार नगरपालिकामा दर्ता हुन आउनु पर्ने धेरै व्यवसाय दर्ता भएका छैनन् । नगरपालिकामा दर्ता भए भने उनीहरुको विवरण हामीसँग हुन्छ, आपत विपतको बेलामा आवश्यक सहयोग गर्न सकिन्छ । फेरि कानुनले पनि नगरपालिकामा दर्ता हुनै पर्छ भनेकोले दर्ता हुन आउनुस भनेर सुचना प्रकाशित गरेका हौं,’ मेयर मादेनले वडापालिकासँग भने ।
उनले सो नगरपालिकामा करिब ६० वटा सहकारी संस्था भएपनि १८ वटा मात्रै दर्ता हुन आएको बताए । सहकारी संस्थाहरु पनि स्थानीय तहमा दर्ता हुनुपर्ने कानुनी व्यवस्था छ ।
