Odapalika - The Fourth Estate - चौथो अंग
तिहारलाई लक्षित गर्दै पोखरा महानगरले हाटबजार चलाउने, सयपत्री फूलको मूल्य निर्धारण

काठमाडौँ । पोखरामा रैथाने हाटबजार सञ्चालनमा आउने भएको छ । पोखरा महानगरपालिका र श्री कम्प्लेक्स प्रालिको साझेदारीमा हाटबजार सञ्चालन गर्न लागिएको हो । हाटबजार आउँदो शनिबार शुभारम्भ गरिने कार्यक्रम रहेको पोखरा महानगरपालिकाको आर्थिक विकास महाशाखा प्रमुख मनहर कडरियाले जानकारी दिए ।

उनका अनुसार हाटबजारमा स्थानीय उत्पादनका दसभन्दा बढी स्टल रहनेछन् । मनखुसी फाउन्डेसनले तयार गरेको ह्यान्डीक्राफ्ट (मोजा, टोपी), प्राप्ति प्रशान्त हस्तकलाले तयार गरेको पोते माला, आमा एग्रो प्रडक्टका स्थानीय कृषि उपज, सगुन हस्तकलाले तयार गरेको धागोका सामान हाटबजारमा राखिने छ । 

यस्तै पुष्पाञ्जलीद्वारा तयार गरिएको विवाहका लागि चाहिने सामान (साइपाटा), विधाता हस्तकला उद्योगद्वारा उत्पादित हस्तकलाका सामग्री, कृषि सञ्जाल वडा नं ६ ले उत्पादन गरेका कृषिउपज र महिला सीप विकास संस्थाद्वारा उत्पादित स्थानीय हस्तकलाका सामाग्री पनि राखिने भएको छ ।

हाटबजारमा तिहारलाई लक्ष्य गर्दै रैथाने खानाका परिकार (सेलरोटी, झिलिङ्गा, चिनीरोटी), स्थानीयस्तरमा उत्पादित खाद्य वस्तु कोदो, मकै, गहुँ, फापरलगायत विभिन्न तरकारी पनि बिक्रीका लागि राखिने प्रमुख कडरियाले बताए ।  

उनका अनुसार सो अवसरमा तीन दिनसम्म सयपत्री फूल मेला–२०८० समेत आयोजना गरिनेछ । महानगरपालिकाले स्थानीय कृषकसँग साझेदारी गरेर एक सय ६५ रोपनीभन्दा बढी जमिनमा सयपत्री फूल लगाएको र उत्पादित फूल पनि बिक्रीमा राखिनेछ । 

सयपत्री फूलमा महानगरपालिका आत्मनिर्भर भएको उनले बताए । प्रमुख कडरियाले भने, ‘यसपालीको तिहारमा सयपत्री फूल पोखरामा बाहिरबाट ल्याउनुपर्ने अवस्था छैन, हामी यसमा आत्मनिर्भर भएका छौँ’, उनले भने ।

महानगरपालिकाले सयपत्री फूलको दररेटसमेत तोकेको छ । 

महानगरपालिकाको आर्थिक विकास महाशाखा, पोखरामा क्रियाशील पुष्प व्यवसायी र स्थानीय कृषकको समन्वयमा फूलको दर तोकिएको हो । दररेटअनुसार सयपत्री फूलको १५ देखि २० ग्रामको एक थुङ्गालाई पाँच देखि दश रुपैयाँ, १५ ग्राम तौल भएको एकथुङ्गाको मूल्य चार रुपैयाँ र पाँचदेखि दस ग्राम तौलको फूल दुई रुपैयाँ तोकिएको छ । यस्तै मालाको क्रमशः दुई सय, एक सय ८० र एक सय ५० रुपैयाँ तोकिएको छ भने प्रतिकेजी सयपत्री फूलको मूल्य  चार सय रुपैयाँ तोकिएको छ । 

श्री कम्प्लेक्समा तीन दिनसम्म चल्ने मेलामा स्थानीय तथा रैथाने उत्पादन प्रवद्र्धन, विकास र बजारीकरणका सम्बन्धमा थप छलफल तथा अन्तक्र्रियात्मक कार्यक्रमहरू गरिनेछन् । रासस

प्रकाशित मिति: बिहीबार, कात्तिक २३, २०८०  १२:३४
प्रतिक्रिया दिनुहोस्
Weather Update