काठमाडौँ । ओखलढुंगा जिल्लाको सिद्धिचरण नगरपालिकामा पहिरो जाँदा २ घरमा क्षति पुगेको छ ।
सोमवार अपरान्हदेखि परेको अविरल वर्षाको कारण सो नगरपालिकाको वडा नम्बर १२ मा पहिरो जाँदा स्थानीय पेशलबहादुर खत्री र सोमबहादुर खत्रीको घरमा क्षति पुगेको सोही वडाका वडा अध्यक्ष उमंग श्रेष्ठले जानकारी दिए ।
‘आज विहान साढे ६ बजेतिर पहिरो गएको रहेछ । २ घरमा क्षति पुगेको छ । अहिले नेपाली सेना, नेपाल प्रहरी र नगरपालिकाको टोलीले उद्धारकार्य गरिरहेको छ,’ वडा अध्यक्ष श्रेष्ठले वडापालिकासँग भने ।
उनले अहिले पानी केही रोकिएको बताए । उद्धारकार्य भइरहेकोले के कति क्षति पुगेको छ भन्ने यकिन भएको छैन ।
पहिरोमा परी भारतको दार्जिलिङ घर भएका नितेश राईको खुट्टामा चोट लागेको छ । यस्तै, मोलुङ– ५ की नबिना धमलाको खुट्टामा चोट लागेको छ । राई पहिरोले क्षति पुगेको सोमबहादुर खत्रीको घरमा डेरा गरी बस्ने गरेका थिए भने धमला पेशल खत्रीको घरमा डेरा गरी बस्ने गरेको वडा अध्यक्ष श्रेष्ठले जानकारी दिए ।
