ललितपुर । ललितपुर महानगरपालिकाले महानगरभित्रका पशुपक्षी र माछाको तथ्यांक संकलन थालेको छ ।
महानगरको टोलीले आजबाट स्थानीयवासीले घरमा पालेका पशुपक्षी र माछाको तथ्यांक संकलन थालेको महानगरको पशु सेवा शाखाका प्रमुख राजेन्द्र बिष्टले वडापालिकालाई बताए ।
उनका अनुसार महानगरभित्र भएका गाईभैँसी फार्म, कुखुरा फार्म, मत्स्यपालन फार्मसहितको एकीकृत तथ्यांक संकलन गर्न टोली खटाइएको हो । यसका लागि २ जना गणकहरुले घरघरमा पुगेर पशुपक्षीको तथ्यांक संकलन गर्नेछन् ।
महानगरभित्र व्यावसायिक पशुपालनको अवस्थासहित निर्वाहमुखी पशुपालनसमेतको तथ्यांक संकलन गरेपछि कृषकहरुलाई आवश्यक पर्ने प्राविधिकलगायतका तालिम दिन सहयोग पुग्ने विष्टको भनाइ छ ।
महानगरले सीपसँगै व्यावसायिक पशु तथा मत्स्यपालनमा संलग्नलाई अनुदानलगायतको सहयोग गर्नसमेत यो तथ्यांकले सहयोग पुग्ने विष्टको भनाइ छ । महानगरले ५ वर्षअघि पनि यस्तो तथ्यांक संकलन गरेको उनको भनाइ छ ।
