काठमाडौँ । रौतहटको मौलापुर नगरपालिकाले स्थानीयबासीले बालेको बिजुलीको महसुल नेपाल विद्युत प्राधिकरणलाई तिरिदिएको छ । 

विद्युत प्राधिकरणले मौलापुर सबस्टेशन अन्तरगत बितरित बिजुलीको पेसा नतिर्ने ग्राहकको लाइन धमाधम काटिरहेका बेला नगरपालिकाले भने स्थानीले घरमा बालेको बिजुलीको पैसा र सिंचाइ प्रयोजनका लागि प्रयोग भएको बिजुलीको पैसा तिरिदिएको हो । 

गत बैशाखदेखि कात्तिक मसान्तसम्मको गरेर नगरपालिकाले  २ करोड ६६ लाख ८४ हजार ९१० रुपैयाँ  तिरेको हो । 

नगरपालिकाको निर्णयअनुसार सो रकम बराबरको चेक मेयर रिनाकुमारी साहले  नेपाल विद्युत प्राधिकरण, मौलापुर वितरण केन्द्रका प्रमुख रामदिनेश प्रसाद यादवलाई हस्तान्तरण गरेकी छन् ।  नगरपालिकालेले नगरबासीका लागि बिजुली र पानी निःशुल्क गर्ने घोषणा गरेको छ ।