ताप्लेजुङ । मैवाखोला गाउँपालिकाले पहिरोबाट विस्थापित परिवारका लागि एकीकृत बस्ती निर्माण थालेको छ ।
गाउँपालिका अध्यक्ष विजयप्रकाश वनेमले ३ दिनमा १५ अस्थायी घर निर्माण भइसकेको बताउँदै टोल विकास स.स्थाहरुसँग समन्वयमा काम भइरहेको बताए ।
उनले बाढीपहिरो पीडितलाई स्थानान्तरण गर्न अस्थायी घर निर्माण स्वःस्फूर्तरूपमा सहभागी हुन श्रमदान गर्न स्थानीयलाई आग्रहसमेत गरेका छन् ।
गाउँपालिकाका अनुसार जोखिममा रहेका ओदक क्षेत्रका ६४ घरपरिवारलाई मैवाखोला गाउँपालिका वडा नं ३ मा रहेको मदन भण्डारी रंगशालामा अस्थायी एकीकृत बस्ती बनाएर स्थानान्तरण गरिदै छ ।
गत २ असारमा आएको पहिरोले ओदकका घरहरू जोखिममा परेका छन् । पालिकाले बस्ती निर्माणका लागि आवश्यक पर्ने कच्चा पदार्थ स्वेच्छिकरूपमा उपलब्ध गराउन आग्रह गरेको छ ।
६४ घरपरिवारलाई एकीकृत बस्ती निमार्ण गर्न १ करोड रुपैयाँ खर्च लाग्ने देखिएको निमित्त प्रमुख प्रशासकीय अधिकृत लक्ष्मीमाया गोम्देनले जानकार दिएकी छन् ।
