काठमाडौँ । कर्णाली प्रदेश सरकारले प्रदेशभित्र कार्यरत निजामती कर्मचारीलाई विवाह विदासमेत दिनेगरी नियमावली बनाएको छ ।
१० माघमा राजपत्रमा प्रकाशित प्रदेश निजामती सेवा नियमावलीमा कर्मचारीलाई १० दिनसम्म विवाह बिदा दिने प्रावधान समेटिएको हो ।
‘कुनै निजामती कर्मचारीको विवाह हुने भएमा त्यस्तो निजामती कर्मचारीले सात दिन विवाह बिदा पाउनेछ,’ निवयमावलीको नियम ९५ मा उल्लेख छ ।
नियमावलीका अनुसार यस्तो बिदा दाबी गर्ने कर्मचारीले विवाह भएको १५ दिन भित्रमा विवाह दर्ताको प्रमाणपत्र भने अनिवार्य रुपमा पेश गर्नुपर्नेछ ।
विवाह विदा लिएर विवाह दर्ताको प्रमाणपत्र पेश नगरेकोे अवस्थामा भने कर्मचारीको बिदाको अवधि अन्य विदाबाट कट्टी गरिनेगरी नियमावलीमा व्यवस्था गरिएको छ ।
यसअघि गण्डकी प्रदेश सरकारले समेत अध्यादेशमार्फत कर्मचारीले ७ दिन विवाह बिदा दिने व्यवस्था गरिसकेको छ ।
‘स्थानीय सेवाको गठन, सञ्चालन र सेवाका शर्त सम्बन्धमा व्यवस्था गर्न बनेको अध्यादेश’ मार्फत कर्मचारीले विवाह विदा पाउने व्यवस्था गरिएको हो ।
कर्मचारीहरुले विवाहका लागि बिदा माग्ने गरेको र बिदा नदिएपनि उनीहरु कार्यालय आउन नसक्ने अवस्था भएकाले ऐनमा भएको विदा पाउने व्यवस्थालाई व्याख्या गर्दैै ७ दिन बिदा दिने प्रावधान राखिएको कणालीको आन्तरिक मामिला तथा कानुन मन्त्रालयले जनाएको छ ।
पूर्व प्रधानमन्त्री चन्द्र शमशेरको शासनकालमा कर्मचारीलाई विवाह विदा दिने व्यवस्था थियो । तर त्यसयता संघीय सरकारले निजामती कर्मचारीका लागि यस्तो बिदा दिने व्यवस्था गरेको थिएन ।
सरकारले संसदमा पेश गरेको संघीय निजामती सेवा विधेयकमा भने कर्मचारीलाइृ विवाह विदा दिने प्रस्ताव गरिएको छ ।
तर यस्तो विदा कति दिन दिने भनेर उल्लेख छैन । कानुन मन्त्रालयका अधिकारीहरुका अनुसार विधेयकमा भएको यो विदासम्वन्धि व्यवस्था पारित भएर कानुन बनेमा नियमावलीमार्फत ७ दिन बिदा दिने प्रावधान राख्ने तयारी सरकारको छ ।
यस्तो छ कर्णाली सरकारले बनाएको नियमावली
