काठमाडौँ । नवलपुर जिल्लामा पर्ने मध्यविन्दु नगरपालिकाले माघ १५ गते एक सार्वजनिक सूचना प्रकाशित गर्यो । नगरपालिकाले १ जना करारमा कर्मचारी लिने सम्बन्धी सूचना थियो त्यो ।
नगरपालिकाले प्रकाशन गरेको सूचनामा ६० वर्षसम्म उमेरको नेपाली नागरिकले आवेदन दिन सक्ने भनिएको थियो । आवेदन दिनको लागि न्यूनतम उमेर भने ३० वर्ष राखिएको थियो ।
अहिलेको कानुनी व्यवस्था अनुसार निजामती कर्मचारीले ५८ वर्षमा अनिवार्य अवकाश पाउँछन् । तर, नगरपालिकाले करारमा लिन लागेको कर्मचारीको उमेर हद किन ६० वर्षसम्म राखियो ? यो प्रश्न अहिले चर्चामा छ ।
याे विषय बुझ्न वडापालिका डटकमले सो नगरपालिकाका प्रमुख प्रशासकीय अधिकृत रमेश घर्तिसँग सम्पर्क गरेको छ । सो सूचनामा प्रमुख प्रशासकीय अधिकृत घर्तिले नै हस्ताक्षर गरेका छन् ।
‘शिक्षा सम्बन्धि करिकुलम बनाएर त्यसको कार्यान्वयन पनि गर्नको लागि करारमा विशेषज्ञ लिन लागिएको हो । त्यसको कार्यविधि अनुसार कम्तिमा १० वर्षको अनुभव भएको व्यक्ति हुनुपर्छ । अलि अनुभवी व्यक्तिहरु आउन भनेर उमेर हद ६० वर्षसम्म राखिएको हो,’ प्रमुख प्रशासकीय अधिकृत घर्तिले वडापालिकासँग भने ।
