काठमाडौँ । राष्ट्रिय स्वतन्त्र पार्टीका सभापति एकं चितवनका सांसद रवि लामिछानेले, आफ्नो पार्टीले नेपाल फर्किन चाहने नेपाली नागरिकका लागि १०० भन्दा धेरै रोजगारी सृजना गरेको दाबी गरेका छन् ।
बुधबार समाजिक सञ्जाल मार्फत रविले १०० जनाको लागि रोजगारी खोजिएको र पार्टीको नीति अनुसार चाँडै थप रोजगारी सृजना गर्ने बताएका छन् ।
‘यी विज्ञापनहरु विभिन्न देशका पत्रिका, अनलाइन र चोकका पसलहरुमा छापिएका छन्, छापिदैछन् । चुनावमा आफुले बोले अनुसार फ्री टिकटमा नेपालमै फर्किन चाहनेका लागि १०० भन्दा बढी जागिरको व्यवस्था गरेका छौं, त्यो पनि “बिना ढेउवा के,’ सामाजिक सञ्जाल फेसवुकमा उनले लेखेका छन् ।
थप भनेका छन्, ‘अहिलेका लागि यी रोजगारी खोजिएको हो, छिट्टै रोजगारी सृजना गर्ने वातावरण बनाउने छौँ । मैले उपनिर्वाचनमा विजय हासिल गरेको, भोलि १०० दिन पूरा हुदै छ । बोलेका थुप्रै काम (स्टन्ट) बारे भोलि दिन भरी विभिन्न कार्यक्रम मार्फत जानकारी दिदैछु ।’ उनले आफ्नो पार्टी जनता माझ गरेका प्रतिवद्धताबाट पछि नहटेकोसमेत दाबी गरेका छन् ।
यस्ता छन् रविका ९ योजना
- १०० जनालाई टिकट काटेर नेपाल ल्याएर रोजगारी दिने
- विपन्न परिवारका लागि ५ लाख बराबरको निःशुल्क उपचार
- राष्ट्रिय आधारभूत विद्यालयको स्तरोन्नति
- गुनासो व्यवस्थित गर्न हेल्लो रवि कार्यक्रम
- प्राकृतिक विपत्तिमा सघाउन हेल्लो र्यापिड टीम
- ५४ हजार १७६ विरुवा रोप्ने
- महिलाका लागि निःशुल्क बस
- ६५ वर्षमाथिका नागरिकलाई निःशुल्क स्वास्थ्य सेवा
- २ वटा विद्यालयलाई प्रविधिमैत्री बनाउने
तर पैसा कहाँबाट आउँछ रवि दाइ ?
जनताले सांसदहरुलाई देशको कानुन र नीति बनाउनका लागि निर्वाचित गरेर पठाएका हुन् । रविलो आफ्नो निर्वाचन क्षेत्रका जनताका लागि भने वडाध्यक्षले गर्नुपर्ने भन्दा जनमैत्री कार्यक्रम ल्याएका छन् ।
सामाजिक सञ्जालहरुमार्फत उनले गरेको विज्ञापन अनुसारका काम गर्न रविलाई निकै धेरै रकमको जरुरत पर्छ ।
चितवन–२ का जनताका लागि उनले भनेका सेवा र काम निःशुल्क गर्न उनका नाममा आउने संसद विकास कोषको रकमबाट समेत पुग्दैन । संघीय सांसदले आफ्नो निर्वाचन क्षेत्रको पूर्वाधार विकासका लागि ५ करोड रुपैयाँ छुट्याएको छ । यो रकम पनि रविले बनाएका सबै योजनामा खर्च गर्न पाइदैन । पूर्वाधार लक्षित याे रकमबाट रविले अघि सारेका याेजनामा खर्च गर्न पुग्दैन ।
यस्तो अवस्थामा चितवनका जनताका लागि खर्च गर्न रविले आफुले कहाँबाट आर्थिक व्यवस्थापन गर्छु भनेर कतै खुलाएका छैनन् ।
१०० दिनमा सम्पन्न गर्ने भनेर ९ वटा कार्यक्रम अघि सारेका रविले यो थपिदै जाने बताएकाले उनका लागि थप आर्थिक व्यवस्थापन आवश्यक देखिन्छ ।
रविका सहयोगीहरुले भने सामाजिक सञ्जाल र निर्वाचन क्षेत्रमा गरिने सार्वजनिक सुनुवाई कार्यक्रमहरुमार्फत रकम व्यवस्थापनका विषयमा प्रष्ट परिने बताउँदै आएका छन् ।
