काठमाडौँ । काठमाडौं महानगरपालिकाले अस्पतालबाट उत्पादित फोहोरलाई स्रोतमै वर्गीकरण गर्न, प्रकृति र मात्राको अभिलेखन गर्न सुझाव दिएको छ ।
आज मध्यबानेश्वरस्थित भरोसा र भेनस अस्पतालको अनुगमनका क्रममा सुझाव दिँदै महानगरका अधिकारीहरुले अहिलेको अनुरोधलाई सुधारको मौकाका रुपमा लिन आग्रह गरेका हुन् ।
भरोसा अस्पतालले फोहोर उत्पादन हुने हरेक ठाउँहरुमा (वार्ड, शल्यक्रिया हुने ठाउँ, इमर्जेन्सी, प्रयोगशाला, भण्डारण कक्ष) २० लिटर क्षमताका अटोक्लेभ मेसिन राखेको छ । तर उत्पादित फोहोर वर्गीकरण गरेको छैन ।
मध्यबानेश्वरकै भेनस अस्पतालको फोहोर व्यवस्थापन प्रणाली कमजोर देखिएको महानगरले जनाएको छ । वर्गीकरण, ढुवानी, निर्मलीकरण र भण्डारण प्रणालीका हरेक ठाउँमा तत्काल सुधार गर्नु पर्ने देखिएको अनुगमन टोलीको निष्कर्ष छ ।
‘अनुगमनमा अपेक्षित अवस्था पाइएन । तत्काल सुधार नगर्ने हो भने कारवाहीको प्रक्रियामा जानु पर्ने हुनसक्छ,’ महानगर वातावरण व्यवस्थापन विभागकी वरिष्ठ इञ्जिनियर निशा कोइरालाले भनिन् ।
