काठमाडौँ । तीनवटा सरकारी कार्यालयले ठूलो संख्यामा कर्मचारी माग गरेका छन् । शुक्रबार सार्वजनिक सूचना जारी गर्दै कृषि विकाश बैैंक, नागरिक उडड्यन प्राधिकरण (क्यान) र कर्मचारी सञ्चय कोषले २४० जना कर्मचारी माग गरेका हुन् ।
सबैभन्दा धेरै कृषि बैंकले ११२ जना, क्यानले ९८ जना र कोषले ३० जना कर्मचारी माग गरेका हुन् ।
कृषि विकास बैंकले माग्यो ११२ जना कर्मचारी
कृषि विकास बैंकले विभिन्न पदमा लागि ११२ जना कर्मचारी मागेको छ । बैंकले शुक्रबार एक सूचना जारी गर्दै चैत १ गतेसम्म अनलाइनमार्फत आवेदन खुलाएको हो ।
सूचना अनुसार शाखा प्रमुखदेखि लेखापालसम्म कर्मचारी माग गरिएको छ । सूचना अनुसार प्रशासन तर्फ ८ औँ स्तरको शाखा प्रमुख अधिकृतमा २ जना, वरिष्ठ लेखा अधिकृतमा २ जना, व्यवसाय अधिकृतमा ३२, २ जना कम्प्युटर अधिकृत, १ जना आइटी इन्जिनियर, ६ जना कर्जा अधिकृतका लागि आवेदन खुलाएको हो ।
यस्तै, व्यवसाय सहायकमा १६ जना, कानुन सहायकमा १ जना, ३ जना कर्जा सहायक, १ जना ओभरसियर र ४६ जना लेखापाल मागेको छ ।
क्यानले माग्यो ९८ कर्मचारी
नेपाल नागरिक उड्डयन प्राधिकरण (क्यान) ले विभिन्न तहका लागि ९८ जना कर्मचारी माग गरेको छ । शुक्रबार प्रकाशन भएको सूचना अनुसार उपमहानिर्देशकदेखि सहायकस्तर सम्मका ९८ जना कर्मचारी माग गरिएको हो ।
चालू आर्थिक वर्ष २०८०/०८१ को असार मसान्तसम्म रिक्त हुने उपनिर्देशकका लागि समेत क्यानले सूचना प्रकाशन गरेको छ ।
प्राविधिकतर्फ दशौँ तहको उपनिर्देशक, प्रबन्धक, उपप्रबन्धक, वरिष्ठ अधिकृत १/१ जना तथा ४३ जना एयर ट्राफिकतर्फ वरिष्ठ अधिकृतमा दरखास्त मागेको छ । त्यस्तै विभिन्न उपसमूहतर्फ वरिष्ठ सहायक र सहायक पदमा आवेदन खुलाएको हो।
प्राधिकरणले एभिएशन फायर सर्भिसेसतर्फ १७ जना प्राविधिक सहायक मागेको छ ।
सूचना अनुसार योग्य मानिसले चैत १ गतेसम्म र दोब्बर दस्तुर तिरेर चैत ८ गतेसम्म अनलाइनमार्फत आवेदन फाराम भर्न सक्नेछन् ।
कोषले माग्यो ३० कर्मचारी
कर्मचारी सञ्चय कोषले विभिन्न पदमा ३० जना कर्मचारी माग गरेको छ । २१ दिनको अवधि राखेर प्रकाशन भएको सूचना अनुसार नवौंदेखि पाँचौं तहका विभिन्न पदका लागि कर्मचारी मागेको हो ।
जसमा वरिष्ठ प्रबन्धक, प्रबन्धक र उपप्रबन्धक एक/एक जना मागेको छ । सहायक प्रबन्धक १२ जना माग गरेकोमध्ये खुलबाट ७ जना, महिला र आदिवासी जनजातिबाट २/२ जना र मधेसीबाट १ जना रहेका छन् ।
त्यस्तै प्रशासनतर्फ र प्राबिधिकतर्फ १/१ जना सहायक प्रबन्धक मागिएको छ । पाँचौं तहको प्रशासनतर्फ प्रमुख सहायकका लागि १३ जना कर्मचारी माग गरिएकोमा ८ जना खुलाबाट, महिला र आदिवासी जनजातिबाट २/२ जना र १ जना मधेसी रहेको छ ।
