काठमाडौँ । बागलुङ जिल्लाको जैमिनी नगरपालिकाले हलगोरु पाल्न नगरभित्रका ३० जना कृषक छनौट गरेको छ ।
नगरपालिकाले आह्वान गरेको प्रस्तावअनुसार गोरु पाल्ने ३० जना कृषकको छनौट गरिएको नगरपालिकाले जनाएको छ । गोरु पाल्ने कृषकलाई जनही १० हजार रुपैयाँका दरले नगरपालिकाले अनुदान दिने बताएको छ ।
नगरपालिकाले रैथाने बाली र पशु चौपाया पालनलाई प्रोत्साहन गर्न विभिन्न अनुानमूलक कार्यक्रम संचालनमा ल्याएको छ ।
स्थानीय स्रोत साधनको उपयोगमार्फत कृषि उत्पादनमा आत्मनिर्भर बनाउने उद्देश्यले किसानलाई अनुदान दिने कार्यक्रम ल्याएको नगरपालिकाले जनाएको छ ।
गोरु पाल्ने र गोरुसँग खेतीपातीमा लाग्ने किसानको पहिचान गरेर प्रोत्साहन उपलव्ध गराउन लागिएको पशु शाखा प्रमुख कृष्णप्रसाद ढकाल बताउँछन् ।
नगरपालिकाले व्यावसायिक राँगो पालन गर्न चाहने कृषकसमेत छनौट गरेर अनुदान दिने भएको छ । नगरपालिकाले २० जना कृषक छनौट गरी अनुदान दिन लागेको हो ।
त्यसैगरी, नगरपालिकाले एकल महिला र पुरुषलाई व्यावसायिक बाख्रा पालगनका लागि समेत अनुदान दिने भएको छ । यसका लागि ३० जना कृषक छनौट भएका छन् ।
नगरपालिकाले १६ जना कृषकलाई व्यावसायिक पशुपालन गर्न चाहने १६ जना कृषकलाई प्रस्तावको आधारमा ५० प्रतिशत अनुदान पनि दिएको जनाएको छ । यो कार्यक्रम दूग्ध उत्पादक कृषकमा समेत लागू गरिएको नगरको भनाइ छ । नगरपालिकाले ३०० बढी हाते ट्रय्याक्टरसमेत वितरण गरेको जनाएको छ ।
