![रबि लामिछानेको अंशमा फेरि गृह मन्त्रालय !](https://www.odapalika.com/uploads/posts/new-gathbandan1709530748.jpg)
काठमाडौँ । नयाँ सत्ता समीकरणपछि बन्ने सरकारमा राष्ट्रिय स्वतन्त्र पार्टीका सभापति रबि लामिछाने उपप्रधानमन्त्रीसहित गृहमन्त्री बन्ने लगभग पक्का भएको छ ।
आज बिहान प्रधानमन्त्री निवास बालुवाटारमा प्रधानमन्त्री पुष्पकमल दाहाल ‘प्रचण्ड’ र रास्वपा सभापति रबि लामिछानेबीच भएको भेटमा प्रधानमन्त्री दाहाल लामिछानेलाई सो जिम्मेवारी दिन सहमत भएका हुन् ।
यसअघि एमाले अध्यक्ष केपी ओलीको निवास बालकोटमा भएको नयाँ समीकरणमा आवद्ध हुने दलको बैठकमा लामिछाने पनि सहभागी थिए ।
सो भेटपछि बढेको राजनीतिक परिवर्तनको चक्करले रबिलाई फेरि पुरानै पदमा लैजाने भएको छ । सवोच्च अदालतले रबि लामिछानेको नेपाली नागरिकतामा प्रश्न उठाएपछि पदबाट राजिनामा दिएका रबि पुनः सो पदमा पुग्ने बाटोमा लागेका छन् ।
रास्वपाका नेताहरुले पनि लामिछानेलाई उपप्रधानमन्त्री सहित गृहमन्त्री दिन प्रचण्ड तयार भएको पुष्टि गरेका छन् । यो विषयमा नयाँ गठवन्धनका दलबीच छलफल भएपनि निष्कर्ष भने निस्किनसकेको बताइएको छ ।