काठमाडौँ । झापाको कमल गाउँपालिकालाई २ महिनाअघि मात्र तामझामका साथ वालमैत्री पालिका घोषणा गरियो ।
पालिकाले बालमैत्री घोषणा गर्न कानुन मात्र बनाएको छैन, व्यवहारिक रुपमा यसको कार्यान्वयन पनि गर्ने बतायो । तर २ महिना नबित्दै सोही पालिकाको वडा नम्बर ५ स्थित मंगलमय माविका प्रधानअध्यापकले एकजना छात्रालाई निलडाम नै बस्नेगरी पाइपले पिँडुलामा बेस्सरी पिटे ।
सामाजिक सञ्जाल फेसबुकमा बिरोध गरेर कमेन्ट गरेको भन्दै प्रधानअध्यापक मोहन बगालेले कार्यालयमै बोलाएर बेस्सरी कुटपिट मात्र गरेनन्, अभिभावक बोलाएर ती छात्रालाई विद्यालयबाट निष्कासन सम्म गर्न भ्याए ।
यो घटना पालिका हुँदै प्रहरीसमक्ष पुगेपछि प्रधानअध्यापक बगाले प्रहरी नियन्त्रणमा पुगे ।
प्रहरीले पक्राउ गरेपनि उनीमाथि कुनै मुद्दा लगाइएको छैन । बरु गाउँपालिकाले घटनाबारे छानविन गर्न भन्दै एउटा समिति बनाएको छ ।
पालिकाले एसइई चलिरहेकाले यो घटनालाई नउचाल्न आग्रहसहित दोषी देखिए कारवाही गर्नै प्रतिबद्धता जनाएको छ ।
पालिकाले वडा नम्बर ५ का वडाअध्यक्षको सयोजकत्वमा ५ सदस्यीय छानविन समिति बनाएर छानविन थालेको बताउँदै २५ गतेभित्र प्रतिवेदन तयार पारेर वुझाउन निर्देशन दिएको छ ।
समितिले दोषी देखाएको अवस्थामा प्रधानअध्यापकमाथि कारवाही गर्ने गाउँपालिका अध्यक्ष हकुमसिंह राईले जारी गरेको विज्ञप्तिमा उल्लेख छ ।
