काठमाडौँ । कालीकोटको तिलागुफा नगरपालिकाले गाउँपालिकाको केन्द्रबाटै आयोडिनयुक्त नुन वितरण गर्न थालेको छ ।
साल्ट ट्रेडिङ कर्पोरेसन लिमिटेडसँगको समन्वयमा नगरपालिकाको केन्द्र गाल्जेमा वितरण केन्द्र स्थापना गरी नुन वितरण गर्न थालेको पालािकाले जनाएको छ ।
नुनकै लागी जिल्ला सदरमुकाम मान्म पुग्नुपर्ने बाध्यताको अन्त्य भएकोमा स्थानीयवासी खुसी भएका छन् । नुन लिन सदरमुकाम जानुपर्ने बाध्यता हटेको तिलागुफा नगरपालिका बताउँछन् ।
एक किलो नुनका लागि एकदिन लगाएर जिल्ला सदरमुकाम मान्म पुग्नुपर्ने बाध्यता हटेकोभन्दै उनीहरुले खुसी व्यक्त गरेका छन् ।
विगतमा नुन लिन जान मात्र २ हजारभन्दा बढी खर्च र पूरै एक दिन समय खर्चनुपर्ने अवस्था अब अन्त्य भएको छ ।
तिलागुफा नगरपालिकाका प्रमुख शङ्करप्रसाद उपाध्यायले साल्ट ट्रेडिङ कर्पोरेसनसँगको सहकार्यमा नगरपालिका केन्द्रमै अस्थायी डिपो स्थापना गरेर नुन वितरण सेवा दिएको बताए ।
लामो प्रयासपछि स्थानीय तहबाटै नुन वितरणको हुन थालेको भन्दै तिलागुफा नगरपालिकाका उपप्रमुख महेन्द्रबहादुर शाहीले अस्थायी कार्यालय खोलेर वितरण गर्न सुरु गरिएको बताए ।
यसअघि रास्कोट नगरपालिका र महाबै गाउँपालिकाले गाउँबाटै नुन वितरण सुरु गरिसकेका छन् ।
