ललितपुर । गोदावरी नगरपालिकामा प्रथम उपत्यकाव्यापी अन्तर पालिका खुल्ला मेयर कप फुटबल प्रतियोगिता शनिबारबाट सुरु भएको छ ।
नगरपालिकाको वडा नं १० टाहाखेल–झ्यालुन्टारमा अवस्थित गोदावरी बहुउद्देश्यीय रंगशालाको झ्यालुन्टार खेल मैदानमा सम्पन्न उद्घाटन खेलमा ललितपुरको महालक्ष्मी नगरपालिकाले आयोजक गोदावरी नगरपालिकाको ए टिमलाई हराएको छ ।
पेनाल्टि सुट आउटमा गोदावरीलाई ४–२ गोल अन्तरले हराउँदै महालक्ष्मीले क्बार्टरफाइनलमा स्थान पक्का गरेको छ ।
महालक्ष्मीका लागि सिद्धान्त अधिकारी , निसान राउत, सरोज राई र निसान बस्नेतले १–१ गोल गरे ।
पराजित गोदावरीका लागि सुबास तामाङ र सायर तामाङले एक–एक गोल गरे । गोदावरीका लागि सुरुवाती २ पेनाल्टि गोलमा परिणत हुन सकेन ।
निराजन मर्हजन र वाङ्गेल लामाले हानेको बलले जाली चुम्न सकेन ।
खेलमा गोदावरीको २ पेनाल्टि रोकेका महालक्ष्मीका गोलकिपर आर्यन मर्हजन म्यान अफ दि म्याच भए । उनले यसबापत नगद ५ हजार पनि पाएका छन् ।
यसअघि निर्धारित ९० मिनेटसम्मको खेल बराबरी भएपछि खेलको निर्णय पेनाल्टि सुटआउटबाट भएको थियो ।
अब सेमिफाइनल प्रवेशका लागि आगामी बैशाख २१ गते महालक्ष्मीले दक्षिणकाली नगरपालिकासँग प्रतिस्पर्धा गर्नेछ । दक्षिणकाली सिधै बाई पाएर क्बार्टरफाइनलमा पुगेको हो ।
उपत्यकाभित्रका १४ वटा पालिकाका १५ वटा टिमले यो प्रतियोगितामा प्रतिस्पर्धा गर्दैछन् ।
गोदावरी नगरपालिकाको बि टिमले बैशाख १९ गते ललितपुर महानगरपालिकासँग खेल्नेछ ।
आइतबार प्रतियोगितामा २ खेल हुँदैछन् । साढे १२ बजे हुने पहिलो खेलमा कोन्ज्योसोम गाउँपालिका र नागार्जुन नगरपालिका भिड्नेछन् भने अर्को खेलमा चन्द्रागिरी नगरपालिका र बाग्मती गाउँपालिकाबीच दिउँसो ३ बजे प्रतिस्पर्धा हुनेछ ।
प्रतियोगिताको विजेता टिमलाई ५ लाख र उपविजेतालाई ३ लाख रुपियाँ पुरस्कार प्रदान गरिने छ ।
यस्तै अनुशासित टिमलाई ५० हजार तथा उत्कृष्ट गोलकिपर, डिफेन्डर , फर्वाड, सर्बाधिक गोलकर्ता र उत्कृष्ट प्रशिक्षकलाई जनही २५ हजार रुपैयाँ प्रदान गरिनेछ ।
प्रतियोगितामा काठमाडौं जिल्लाको ८ स्थानीय तहको ८ टिम तथा ललितपुर जिल्लाको ५ स्थानीय तहको ६ टिम रहेका छन् । यसैगरी भक्तपुर जिल्लाको एक स्थानीय तहबाट १ टिम गरी १५ टिमको सहभागिता छ ।
प्रतियोगितामा काठमाडौँ महानगरपालिका, नागार्जुन नगरपालिका, चन्द्रागिरी नगरपालिका, दक्षिणकाली नगरपालिका, टोखा नगरपालिका, तारकेश्वर नगरपालिका, कीर्तिपुर नगरपालिका, बुढानिलकण्ठ नगरपालिका सहभागी छन् ।
ललितपुरका ६ स्थानीय तहमा महाङ्काल गाउँपालिकाले प्रतियोगितामा सहभागीता जनाएको छैन भने आयोजक गोदावरीसहित ललितपुर महानगरपालिका, महालक्ष्मी नगरपालिका, बाग्मती गाउँपालिका र कोन्ज्योसोम सहभागी छन् ।
आयोजक गोदावरी नगरपालिकाको ए र बि गरी २ वटा टिम रहेको छ ।
भक्तपुरमा रहेका ४ नगरपालिकामध्ये मध्यपुर ठिमी नगरपालिकाले मात्र सहभागिता जनाएको छ ।
