ललितपुर । महांकाल गाउँपालिकामा जारी प्रकाश दाहाल स्मृति पहिलो बागमती अन्तरपालिका भलिबल प्रतियोगिता अन्तगतको महांकाल गाँउपालिका र थाहा नगरपालिकाबीचको सेमिफाइनल खेल बर्षाको कारण एक दिन पछि सरेको छ ।
मंगलबार निर्धारित दोस्रो सेमिफाइनल खेलमा महांकालले पहिलो दुई सेटमा जित हात पारेपछि खेल वर्षाले अवरुद्ध भएको हो । विजेताले फाइनलमा हेटौडा नगरपालिकासँग खेल्ने छ । हेटौडाले घ्यांलेख गाउँपालिकालाई सेमिफाइनलमा हराउदै फाइनलमा प्रवेश गरेको हो ।
राष्ट्रिय रेफ्री श्रीराम बोगटी र जितेन्द्र श्रेष्ठले दिएको जानकारी अनुसार दोस्रो सेमिफाइनल र फाइनल खेल आज हुने छ ।
प्रतियोगिताको कुल पुरस्कार राशि १२ लाख रुपैयाँ रहेको छ । विजेताले ३ लाख, उपविजेताले २ तथा तेस्रो हुने दुवै टोलीलाई १ लाख रुपैयाँ दिइने भएको छ । साथै विधागत उत्कृष्ट खेलाडीलाई ५० हजार रुपैयाँ पुरस्कार रहेको छ ।
प्रतियोगिताको कुल लागत १ करोड ३० लाख रुपैयाँ रहेको छ । प्रतियोगिताका सम्पूर्ण खेलहरू ललितपुर महाकाल गाउँपालिकास्थित महाकाल माविको प्रांगण तथा मानीखेलको भलिबल मैदानमा भइरहेको छ । प्रतियोगिता लिग कम नकआउटको आधारमा भएको हो । सहभागी १६ टोलीलाई ४ समूहमा विभाजन गरिएको थियो ।
प्रतियोगितामा राष्ट्रिय खेलकुद परिषद् र बाग्मती प्रदेश खेलकुद परिषद्को सहयोग रहेको छ । यसै गरी नेपाल भलिबल संघको प्राविधिक सहयोग रहेको छ । ललितपुर जिल्ला खेलकुद विकास समिति सह आयोजक रहेको छ ।
प्रतियोगिताको सुरुवात देखि उत्कृष्ट प्रदर्शन गर्दै आएका हेटौडा र थाहा अपराजित टोली हुन् । घरेलु टोली महांकाल भने पहिलो खेलमा हेटौडासँग पराजित हुनुको बाबजुद उत्कृष्ट कम ब्याक गर्दै सेमिफाइनल प्रवेश गरेको हो ।
