काठमाडौँ । कालीकोटको नरहरिनाथ गाउँपालिकाले पशुपालन गर्ने किसानलाई प्रोत्साहन गर्न गोठालोभत्तादेखि सम्मानका कार्यक्रम राखेको छ ।
पालिकाले चालु आर्थिक वर्षको स्वीकृत बजेटअनुसार ‘कृषकसँग उपाध्यक्ष कार्यक्रम’बाट पशुपालक किसानलाई प्रोत्साहनका विभिन्न कार्यक्रम राखिएको जनाएको छ ।
पालिकाका प्रमुख प्रशासकीय अधिकृत युवराज पौडेलले किसानलाई प्रोत्साहनका लागि ३० लाख रुपैयाँ रकम विनियोजन गरिएको बताए । उक्त रकमबाट गोठालोलाई भत्ता, कृषकलाई सम्मानदेखि अनुदानमा कृषि सामग्री वितरणसम्मका कार्यक्रम समावेश गरिएको छ ।
पालिकाले मंगलबार एक सूचना जारी गर्दै गोठालो भत्ताका लागि आवेदन दिन आग्रह गरेको छ ।
पशुपालन बढाउन गाउँपालिकाले किसानलाई गोठालो भत्ताको व्यवस्था गरेको बताउँदै गाउँपालिकाका प्रमुख प्रशासकीय अधिकृत युवराज पौडेलले पशुपालक किसानलाई मासिक एक हजार प्रदान गरिन लागिएको बताए ।
कार्यविधि अनुसार गोठालो भत्ता कार्यविधिअनुसार चारवटा भैँसी, ३० वटा बाख्रा र ४० वटाभन्दा बढी भेडा व्यावसायिक रूपमा पाल्लेको हुनुपर्नेछ ।
