काठमाडौँ । कोशी प्रदेश सरकार गठनविरुद्ध निवर्तमान मुख्यमन्त्रीले दायर गरेको रिटलाई सर्वाेच्च अदालतका न्यायाधीश हरिप्रसाद फुयालले प्रारम्भिक सुनुवाई गर्ने भएका छन् ।
उता गण्डकी सरकार गठन विरुद्ध परेको रिटलाई भने सर्वोच्च अदालतका न्यायाधीश अब्दुल अजिज मुसलमानले हेर्ने भएका छन् ।
कोशीका निवर्तमान मुख्यमन्त्री केदार कार्कीले बिहीबार सरकार गठनविरुद्ध रिट दायर गरेका थिए । एमाले कोशी प्रदेश संसदीय दलका नेता हिक्मत कार्की बिहीबार मुख्यमन्त्रीमा नियुक्त भएपछि यसलाई चुनौती दिदै कार्कीले रिट दायर गरेका थिए ।
गण्डकी प्रदेश सरकारविरुद्ध सर्वोच्च अदालतमा बिहीबारका लागि पेशी तय भएपनि न्यायाधीशको मृत्युमा शोक बिदा दिइएका कारण हेर्ने पालो आएको थिएन । आज भने मुसलमानको इजलासमा यो मुद्दाको पेशी तोकिएको छ ।
कांग्रेस गण्डकी प्रदेशसभा संसदीय दलका नेता सुरेन्द्रराज पाण्डेले मुख्यमन्त्री खगराज अधिकारीले पाएको विश्वासको मतको बैधानिकतामा प्रश्न उठाउँदै रिट दायर गरेका छन् ।
गत आइतबार प्रदेशसभामा मुख्यमन्त्री अधिकारीले राखेको विश्वासको मत प्रस्तावमा सभामुख कृष्ण धितालले ६० सदस्यमा ३० सांसदको समर्थनलाई बुहमतको विश्वास पाएको घोषणा गरेका थिए । यसलाई निवेदकले अवैध भनेका छन् ।
