काठमाडौँ । ‘दुध तथा दुग्ध पदार्थको सेवन, दुग्ध व्यवसायको प्रवद्र्धन’ भन्ने नाराका साथ जेठ १९ गते २४ औँ विश्व दुध दिवस मनाईने भएको छ । 

राष्ट्रिय दुग्ध विकास बोर्ड, नेपाल डेरी एसोसिएशन, केन्द्रिय दुग्ध सहकारी, दुग्ध विकास संस्थान (डिडिसी¬), पशु सेवा विभाग लगायतका निकायले दुध दिवस मनाउन लागेका हुन् । 

नेपाल डेरी एसोसिएशनको केन्द्रिय कार्यालयमा सरोकारवाला बिहीबार पत्रकार सम्मेलनको आयोजना गर्दै झापाको मेचीनगर १९ दुवागढीको एनएमसी एग्रो फार्ममा उक्त कार्यक्रम आयोजना गर्ने जानकारी गराईएको हो । 

राष्ट्रिय दुग्ध विकास बोर्डकी डा. हसना ममैया श्रेष्ठले नेपालमा सबै सरोकारवालाहरुको साथ र सहयोगमा विगत १५ वर्षदेखि विश्व दूध दिवस मनाउँदै आएको र अब आउने दिनमा पनि यसरी नै साथ र सहयोग पाउने अपेक्षा रहेको बताइन् । 

नेपाल डेरी एसोसिएशनका अध्यक्ष प्रल्हाद दाहालले दैनिक गुणस्तरीय दुध सेवनका लागि जनचेतना जगाउने र पोषणयुक्त दुध तथा दुग्ध पदार्थको उपभोगमा वृद्धि गर्न सातै प्रदेशमा सबै सरोकारवाला निकायले विभिन्न कार्यक्रम गरेर दुध दिवस मनाउने बताए ।

पशु सेवा बिभागका पशु विकास अधिकृत सिताराम वलीले नेपालमा उत्पादन रहेको दुध गुणस्तर रहेको र त्यसमा कुनै समस्या नरहेको कुरा बताए । अन्तरक्रिया कार्यक्रममा विभिन्न पत्रकारहरुले विभिन्न प्रश्नहरु उठाएका थिए । उठेका सबै प्रश्नका उत्तर उपस्थित सरोकारवाला सबैले पालैपालो दिएका थिए। 

आज र भोलि गते पुश सेवा विभाग, राष्ट्रिय पशुपन्छी श्रोत व्यवस्थापन तथा प्रवद्र्धन कार्यालय हरिहभवनले ललितपुर स्कुलका बालबालिकाहरूलाई दुधको महत्व बारेमा जनचेतनात्मक कार्यक्रमका साथै दुध तथा दुग्ध पदार्थ वितरण कार्यक्रम रहेको एसोसिएशनले जनाएको छ ।

त्यस्तै आगामी आर्थिक वर्ष २०८१/८२ को बजेटप्रति डेरि क्षेत्रका समस्या सम्बोधन नभएको भन्दै उद्योगीहरूले निरुत्साहित भएका छन् । डेरी एसोसिएसनका पूर्व अध्यक्ष सुमित केडियाले सरकारले ठूलो आकारको बजेट संसदमा पेशा गर्दा कृषि तथा पशुपन्छी विकास मन्त्रालयलाई भने ३ प्रतिशत पनि नछुट्याएको बताए ।

सरकारले विद्यालयलाई उपलब्ध गराउने दिवा खाजा अन्तर्गतको कार्यक्रममा दूध तथा दुग्ध पदार्थलाई समावेश गरिदिए डेरी उद्योगी व्यवसायीको समस्या केही हदसम्म समाधान हुने कुरा कार्यक्रमका सभापति,केन्द्रिय वरिष्ठ उपाध्यक्ष एवं राष्ट्रिय दुग्ध विकासका बोर्ड सदस्य कृष्ण प्रसाद सापकोटाको भनाइ छ ।

सन् २००१ देखि जुन १ लाई विश्व दूध दिवसको रूपमा मनाउँदै आइएको छ । नेपालले पनि सन् २०११ बाट विश्व दूध दिवस मनाउन थालेको छ । आजसम्म आउँदा पनि दुध दिवसको जसरी चर्चा हुनुपर्ने हो त्यसरी भएको भने पाइदैन ।

नेपाल डेरी एसोसिएशनले दुध दिवसको पूर्वसन्ध्यामा विभिन्न कार्यक्रम आयोजना समेत गरेको जनाएको छ । एसोसिएशनले गत जेठ १४ गते काठमाडौँको त्रिरत्न आवसीय विद्यालय स्वयम्भुमा स्कुलस्तरीय दुधको सेवन सम्बन्धी वक्तृत्वकला प्रतियोगिता एवं दूधपान कार्यक्रम गरेको थियो ।