काठमाडौँ । खाद्य प्रविधि तथा गुण नियन्त्रण कार्यालय, नेपालगञ्जले नरैनापुर गाउँपालिकामा एकदिवसीय खाद्य स्वच्छता तथा गुणस्तरसम्बन्धी सरोकारवाला अन्तरक्रिया कार्यक्रम सम्पन्न गरेको छ ।
‘खाद्य स्वच्छतामा लगानी बढाऔँ, अप्रत्यासित अवस्थाको पूर्वतयारी गरौँ ’ भन्ने नारासहित सुरु भएको उक्त जनचेतनामुलक अन्तरक्रियात्मक कार्यक्रममा आफ्नो कार्यपत्र प्रस्तुत गर्दै कार्यालय प्रमुखले खाद्य स्वच्छताको परिचय, खाद्य स्वच्छता कसरी कायम गर्न सकिन्छ भन्ने विषयमा प्रकाश पारे ।
उनले खाद्य स्वच्छता कायम गर्न किन जरुरी छ, खाद्य स्वच्छता भएन भने मानव स्वास्थ्यमा कस्तो असर पर्छ, अस्वस्थकर अभ्यासले निम्तिने खाद्यजनित रोग र यसको न्यूनीकरण कसरी गर्न सकिन्छ भन्ने विषयमा चर्चा गरे ।
नेपालको संबिधानमा खाद्यसम्बन्धी हक, खाद्य सम्प्रभुता बारे जानकारी गराउँदै उनले खाद्य ऐन नियममा रहेव्यवस्थाविपरित कार्य गर्नेलाई दण्ड सजाय हुने विषय सहभागीलाइ जानकारी गराए ।
नरैनापुर गाउँपालिकाका अध्यक्ष शाहले जनचेतनामुलक कार्यक्रम समाजमा चेतना ल्याउनको लागि आवश्यक र सहयोगसिद्ध हुने भन्दै आगामी दिनमा यसलाई अझै घनिभूत पार्दै लैजाने प्रतिवद्धता जनाए ।
सहायक प्रमुख जिल्ला अधिकारी माझीले यो कार्यक्रम जनप्रतिनिधिलाई मात्र नभएर विद्यालय तथा आम उपभोक्ता तहसम्म पुर्याउन सके खानपान तथा जीवनशैलीमा अपेक्षित उपलब्धि हासिल हुनसक्ने बताए ।
नरैनापुर गाउँपालिकाका अध्यक्ष इश्तियाक अहमद शाहको प्रमुख आतिथ्य तथा सहायक प्रमुख जिल्ला अधिकारी जोरा सिहं माझीको आतिथ्यमा भएको कार्यक्रमको अध्यक्षता खाद्य प्रविधि तथा गुण नियन्त्रण कार्यालयका प्रमुख अमित भुषण सुमनले गरेका थिए ।
कार्यक्रममा पालिकाका प्रमुख प्रशासकीय अधिकृत जनक लाल चौधरी, वडा नं ६ का अध्यक्ष प्रेम मौर्य, नेपाल प्रहरी र सशस्त्र जम्मा ५) जनाको सहभागिता थियो ।
