काठमाडौं । स्याङ्जाको फेदीखोला गाउँपालिकाले आगामी आर्थिक वर्षमा अनौपचारिक सामाजिक सुरक्षा कोषमा आवद्ध गराउने नीति लिएको छ ।
यही असार ९ गते गाउँपालिकाको सभाले पारित गरेको आगामी आर्थिक वर्षको नीति तथा कार्यक्रम र बजेटमा अनौपचारिक क्षेत्रका मजदुरलाई सामाजिक सुरक्षा कोषमा आवद्ध गराउन आवश्यक स्रोतको सुनिश्चितता गरिने उल्लेख छ ।
मजदुर सञ्चित कोषमा आवद्ध भएका मजदुरलाई मजदुर अञ्चित कोष वा सामाजिक सुरक्षा कोषमध्ये मजदुृरको इच्छाअनुसारको कोषमा गाउँपालिकाबाट तोकिएअनुसारको थप अनुदान रकम दिँदै कोषमा संलग्न गराइने नीति लिएको छ ।
विपन्नको बीमा
फेदीखोला गाउँपालिकाले अपांगता परिचयपत्रवाहक नागरिक, बीमा दर्ता सहयोगी एंव विपन्न नागरिकहरुलाई स्वास्थ्य बीमामा शत प्रतिशत अनुदान दिने नीति लिएको छ ।
बालश्रममुक्त पालिका निर्माण
आगामी आर्थिक वर्षको बजेटमा फेदीखोलालाई बालश्रममुक्त पालिका निर्माण गर्न रकम विनियोजन गरिएको छ । बालश्रममुक्त पालिका निर्माणका लागि तयारी कार्यक्रम गर्न दुई लाख रुपैयाँ विनियोजन गरेको हो । आन्तरिक स्रोतबाट खर्च गर्नेगरी बजेट छुट्याइएको छ ।
फेदीखोला गाउँपालिकालाई बालश्रममुक्त गाउँपालिका घोषणा गर्न आवश्यक जनचेतनाका लागि उक्त रकम खर्च गरिने प्रमुख प्रशासकीय अधिकृत विष्णुप्रसाद पौडेलले जानकारी दिए ।
ध्यान केन्द्र निर्माण
फेदीखोलामा आगामी आर्थिक वर्षमा योग तथा ध्यान केन्द्र निर्माण कार्यान्वयन गर्ने लक्ष्य लिएको छ । यसका लागि पनि दुई लाख रुपैयाँ बजेट विनियोजन गरेको छ । विनियोजित रकमबाट पालिकाभित्र भएका भौतिक पूर्वाधार मर्मत र आवश्यक सामग्री खरिद गरिन प्रमुख प्रशासकीय अधिकृत पौडेलले जानकारी दिए ।
नीति तथा कार्यक्रमकाे पूर्णपाठ
