![लुटेरा पक्राउ गर्ने प्रहरीलाई गाउँपालिकाको सम्मान](https://www.odapalika.com/uploads/posts/mugum-karmarong-1721300802.jpg)
मुगु । मुगूम कार्मारोङ्ग गाउँपालिकाले लुटेरा समूहलाई पक्राउ र अनुसन्धान गर्ने प्रहरीलाई सम्मान गरेको छ ।मुगूम कार्मारोङ्ग गाउँपालिका- १ मा रहेको डोल्फु गाँउका २४ घर र एक सार्वजनिक गुम्वासहित यार्सा लुट्ने समूहलाई अनुसन्धानमा खटिएर चोर पक्राउ गर्न सफल भएको भन्दै गाउँपालिकाले अनुसन्धान गर्ने प्रहरीलाई सम्मान गरेको छ ।
गएको जेठ १२ गते मुगूम कार्मारोङ गाउँपालिका–१ डोल्फु गाउँका स्थानीयबासीहरू यार्सागुम्बा सकंलन गर्न पाटनतिर गएको मौका छोपी लुटपाट गर्ने आठ जनाको समूहले करोडौंको सामान लुटेका थिए ।
३० दिन लामो अनुसन्धानपछि नेपाल प्रहरीले लुटेरा समूहका तीनजनालाई पक्राउ गरि सार्वजनिक गरेको छ भने अझै पाँचजना फरार रहेका छन् ।
सदरमुकाम गमगढीदेखि टाढा रहेको बस्तीमा लुटेराहरुको पहिचान गरि केही सामानसहित तीनजनालाई पक्राउ गर्न सफल भएकोमा पालिकाले नेपाल प्रहरीलाई सम्मान गर्ने निर्णय गरेको गाउँपालिका अध्यक्ष छिरिङ्ग क्याप्ने लामाले बताए ।
जिल्ला प्रशासन कार्यालय मुगुका प्रमुख जिल्ला अधिकारी टोपेन्द्र केसीको उपस्थितिमा जिल्ला प्रहरी कार्यालय मुगुका प्रहरी नायव उपरिक्षक विरेन्द्र थापासहितलाई एक कार्यक्रम गरी सम्मान गर्नुका साथै दोसल्लाह ओडाएर सम्मान गरेको हो ।
लुटेरा समूहले गाउँका २४ वटा घर एक गुम्बाबाट सुन ३५ तोला, चाँदी ९९४ दशमलव ५ तोला,बुद्धको मुर्ती, मूर्ति, मुगाको माला ९५ तोला, यार्सा, मोबाइल र ५० लाख २५ हजार नगद लुटेर लिएको स्थानीयहरुले प्रहरीमा जाहेरी दिएका थिए ।
घटनालगत्तै मुगु प्रहरी कार्यालयबाट प्रहरी निरीक्षक प्रकाश सिंह कमाण्डमा खटिएको टोलीले सातवटा स्थानमा अनुसन्धान सुरु गरेको थियो ।
पक्राउ परेका तीनजनाबाट कटुवा पेस्तोल १ थान, एसएलआर १ थान, २ थान म्याग्जिन, २५ राउण्ड गोली, ३ थान ओकेटोके, १ थान बाइनाकुलर, ५ सेट आर्मीको कम्व्याक ड्रेस, एकवटा ट्रेकिङ झोला र एकवटा सल बरामत गरेको थियो ।
पक्राउ पर्नेमा गुठिचौर गाउँपालिकाका वडा नम्बर ३ का आक्रोश पर्शे भनिने गणेश भण्डारी, सोही ठेगानाका पूर्णप्रसाद भण्डारी र वडा नम्बर ४ का कमल थापाको घटनामा प्रत्यक्ष संलग्नता रहेको पाइएको प्रहरीले जनाएको छ ।
सम्मान कार्यक्रममा मुगूम कार्मारोङ्ग गाउँपालिकाका उपाध्यक्ष छिरिङ्ग फुटि लामा, प्रमुख प्रशासकिय अधिकृत सुवासचन्द्र रावल, सूचना तथा प्रविधी अधिकृत सोबेन्द्र बहादुर मल्ल, नेपाल पत्रकार महासंघका उपाध्यक्ष दान बहादुर बुढा र सचिव जीवन सेजुवाल समेतको उपस्थिति थियो ।