काठमाडौं । प्रसिद्ध दोलखाको भीमेश्वरलाई पसिना आएको छ । बुधबार दिउँसो पौने १ बजेबाट भीमेश्वरलाई आउन थालेको पसिना पौन ३ बजेसम्म नरोकिएको भिमेश्वर नगरपालिकाका प्रवक्ता तारानाथ चौँलागाईंले जानकारी दिए ।
‘भिमेश्वरलाई पौने १ बजेबाट पसिना आउन थालेको छ । अहिलेसम्म रोकिएको छैन,’ उनले भने ।
भिमेश्वरलाई पसिना आएपछि जनप्रतिनिधिहरु र प्रमुख जिल्ला अधिकारी (सिडिओ) टुवराज पोखरेल भिमेश्वर मन्दिर परिसरमा आइसकेको जानकारी दिएका उनले सर्वसाधारणको पनि घुइँचो लागेको बताए ।
सुरुमा भिमेश्वरको शिलाकाे शिरबाट पसिना आउन थालेको र त्यसपछि मध्य भागबाट पसिना आइरहेको भिमेश्वर नगरपालिकाका २ नम्बर वडाका वडा अध्यक्ष स्टालिन श्रेष्ठले जानकारी दिए । उनका अनुसार शिरबाट पसिना आउनु राष्ट्रका लागि अहित हुने संकेतको रुपमा धार्मिक आधारमा विश्वास गरिनेछ ।
पसिना आउन थालेपछि बाजागाजासहित भिमेश्वरको आराधना गरिएको र पसना रोकिएपछि राष्ट्र र आमनागरिकसहित कसैलाई कुनै हानि नोक्सानी नहोस् भन्दै क्षमा पूजा गरिने उनले बताए ।
केही दिनअघि पनि एकैदिन भिमेश्वरलाई दुईपटक पसिना आएकाे थियाे ।
