काठमाडौँ । प्रमुख सत्तासाझेदार दल नेपाली कांग्रेसका महामन्त्री विश्वप्रकाश शर्माले वर्तमान सरकारले कुनै पनि स्टन्ट गर्न नहुने बताएका छन् ।
आइतबार प्रतिनिधिसभा बैठकको विशेष समयमा उनले कुनै पनि काण्ठ दोषी र भ्रष्टाचारीलाई कारबाही गर्नुपर्ने बताए । उनले नक्कली भुटानी शरणार्थीदेखि गिरीबन्धु टी–स्टेट प्रकरणसम्मको छानबिन गर्नुपर्ने बताउँदै कसैलाई पनि उन्मुक्ति दिन नहुने बताए ।
निवर्तमान गृहमन्त्री रवि लामिछानेले मिठो भ्रम दिएको भन्दै उनले गिरीबन्धुदेखि नक्कली भुटानी शरणार्थी प्रकरणको छानबिन गर्नुपर्ने बताए ।
रवि लामिछाने गृहमन्त्री बन्नुभन्दा ९ महिना अघि नै नक्कली भुटानी शरणार्थी प्रकरणको फाइल खुलेको बताउँदै महामन्त्री शर्माले तर, बिदा हुने बेला रविले मिठो भ्रम दिएको टिप्पणी गरे ।
‘गिरीबन्धुमा कसैले छुट पाउनुहुन्न । नक्कली भुटानी शरणार्थी पनि त्यही हो । जुनबेला फाइल खुलेको थियो त्यो बेला कांग्रेस र माओवादीको सरकार थियो,’ उनले भने, ‘निवर्तमान गृहमन्त्री रवि लामिछानले बिदा हुने बेलामा रमाइलो झुट बोल्नुभयो । कुनै फाइल खोलेको २४ घण्टामा सरकार ढालियो भनेर मिठो भ्रम दिनुभयो । त्यो केवल गलत थियो ।’
