काठमाडौंँ । सोमवार अबेर बसेको मन्त्रिपरिषद बैठकले प्रदेश प्रमुखदेखि विभिन्न देशका राजदूतसम्म हेरफेर गरेको छ ।
सरकारले वाग्मती, लुम्बिनी र कर्णाली प्रदेशका प्रदेश प्रमुखलाई पदमुक्त गर्न राष्ट्रपतिलाई सिफारिस गरेको छ ।
संविधानको धारा १६५ को उपधारा १ बमोजिम उनीहरूलाई पदमुक्त गर्न सिफारिस गरेर सरकारले वाग्मतीको प्रदेश प्रमुखमा दीपकप्रसाद देवकोटा, लुम्बिनीमा कृष्णबहादुर घर्तीमगर र कर्णालीको प्रदेश प्रमुखमा यज्ञराज जोशीलाई नियुक्त गर्न सिफारिस गरेको छ ।
सरकारले पाँच देशका नेपाली राजदूतलाई फिर्ता बोलाउने निर्णय पनि गरेको छ ।
मन्त्रिपरिषद्को बैठकले चीन, अस्ट्रेलिया, रुस, श्रीलंका र दक्षिण अफ्रिकाका नेपाली राजदूतलाई फिर्ता बोलाउने निर्णय गरेको छ ।
चीनका लागि नेपाली राजदूत विष्णुकुमार श्रेष्ठ, अस्ट्रेलियाका लागि कैलाशराज पोखरेल, रुसका लागि मिलनराज तुलाधर, श्रीलंकाका लागि वासुदेव मिश्र र दक्षिण अफ्रिकाका लागि नेपाली राजदू दानबहादुर तामाङ फिर्ता बोलाउने निर्णय भएको हो ।
सरकारले १८ देशका लागि नेपाली राजदूत सिफारिस गर्ने निर्णय गरेको छ । बैठकले अमेरिका, बेलायत, दक्षिण कोरिया, रुस, कतार, चीन, डेनमार्क, मलेसिया, पोर्चुगल, पाकिस्तान, भारत, अस्ट्रेलिया, साउदी अरब, दक्षिण अफ्रिका, इजरायल, श्रीलंका, स्पेन र जर्मनीका लागि नेपाली राजदूत सिफारिस गर्ने निर्णय गरेको हो ।
