काठमाडौँ । सरकारले नेपाल विद्युत् प्राधिकरणको सञ्चालकमाथि कारबाहीको ‘डण्डा’ चलाएको छ ।
नेपाल सरकार तथा विद्युत् नियमन आयोगले दिएको निर्देशन कार्यान्वयन गर्न असहयोग गरेको आरोपमा सञ्चालकद्वय कपिल आचार्य र भक्तबहादुर पुनलाई पदमुक्त गरिएको हो ।
डेडिकेटेड र ट्रंक लाइन विवादमा स्पष्टीकरण चित्तबुझ्दो नबुझाएको भन्दै यही साउन १८ गते ऊर्जा जलस्रोत तथा सिँचाइमन्त्री दिपक खड्काले उनीहरुलाई पदमुक्त गर्ने निर्णय गरेका हुन् ।
उनीहरु नेकपा माओवादी र नेकपा एकीकृत समाजवादीको कोटाबाट प्राधिकरणको सञ्चालकमा नियुक्त भएका थिए ।यही १६ साउनमा दुवै जनालाई मन्त्री खड्काले स्पष्टीकरण सोध्ने निर्णय गरेका थिए ।
यही साउन ७ गते प्राधिकरण सञ्चालक समितिको बैठकले डेडिकेटेड र ट्रंक लाइन विवादमा विद्युत् काटेका ६ उद्योगमा लाइन जोडिदिने निर्णय गर्दा पुन र आचार्यले नोट अफ डिसेन्ट लेखेका थिए ।
पदमुक्त भएको पत्र उनीहरुले आइतबार पाएका छन् ।
