काठमाडौँ । नेपाल विद्युत् प्राधिकरणका कार्यकारी निर्देशक कुलमान घिसिङलाई कारबाही गर्ने या नगर्ने भन्ने विषयलाई लिएर संसदीय समितिमा सांसद बाजाबाजमा उत्रिएका छन् ।
डेडिकेटेड र ट्रंकलाइनको बक्यौता विवादलाई लिएर कार्यकारी निर्देशक घिसिङलाई कारबाही गर्न निर्देशन दिने कि नदिने भन्ने विषयमा आइतबार सार्वजनिक लेखा समितिका सदस्यबीच बाजाबाज भएको हो ।
एमालेका सांसद तथा समिति सभापति ऋषिकेश पोखरेल र नेकपा माओवादी केन्द्र सांसदबीच चर्काचर्की परेको हो । सभापति पोखरेलले घिसिङलाई कारबाही गर्ने निर्णय गर्न खोजेपछि प्रतिवादमा माओवादी सांसद उत्रिएका हुन् । माओवादी सांसद अमनलाल मोदी आक्रोशित हुँदै सभापति पोखरेलले घिसिङलाई कारबाही गर्ने निर्णय गरे नमान्ने चेतावनी दिए ।
त्यसपछि मोदीको अभिव्यक्तिको प्रतिवाद गर्दै सभापति पोखरेलले आफू बेइमानी गर्नेलाई कारबाही गर्नुपर्ने पक्षमा रहेको भन्दै ‘नमान्नु न त’ भन्दै मोदीलाई कडा जवाफ फर्काए ।
उनीहरुबीचको बाजाबाजलाई रोक्ने प्रयास कांग्रेसका सांसद देवप्रसाद तिमलसेनाले गरेका थिए ।
