काठमाडौँ । नेपाली सेनाका नवनियुक्त प्रधानसेनापति अशोकराज सिग्देलले पद तथा गोपनीयताको शपथग्रहण गरेका छन् । सोमबार राष्ट्रपति भवन शीतल निवासमा आयोजित विशेष समारोहमा राष्ट्रपति तथा नेपाली सेनाका परमाधिपति रामचन्द्र पौडेलसमक्ष उनले पद तथा गोपनीयताको शपथ लिएका हुन् ।
साथै राष्ट्रपति पौडेलले नवनियुक्त प्रधानसेनापति सिग्देललाई नेपाली सेनाको महारथी पदको दर्ज्यानी चिह्न लगाइदिएका छन् ।
यसअघि सेनाका वरिष्ठतम् रथीका हैसियतले बलाधिकृतरथी सिग्देललाई सरकारले कायममुकायम प्रधानसेनापतिको जिम्मेवारी दिएको थियो । उनले गएको साउन २५ गतेदेखि कायममुकायम प्रधानसेनापतिको जिम्मेवारी सम्हाल्दै आएका थिए ।
प्रधानसेनापति प्रभुराम शर्मा तीनवर्षे पदावधि समाप्त भई सोमबारदेखि नै अनिवार्य अवकाश पाएपछि उनलाई नेपाली सेनाको कमाण्डको जिम्मेवारी दिइएको हो । सेनाको ४५औँ प्रधानसेनापतिका रूपमा सिग्देलले सोमबारदेखि औपचारिक रूपमा कमाण्ड सम्हालेका छन् ।
