काठमाडौँ । आगामी मंसिर १६ गते हुने स्थानीय तहको उपनिर्वाचनका लागि बिहीबारदेखि राजनीतिक दल दर्ता कार्यक्रम सुरु भएको छ । निर्वाचन आयोगका अनुसार निर्वाचनमा भाग लिन चाहने राजनीतिक दलले बिहीबारदेखि आउँदो बुधबारसम्म दर्ता गर्नुपर्ने हुन्छ ।
स्थानीय तहको उपनिर्वाचनको स्वीकृत कार्यतालिकाअनुसार असोज १० देखि १६ गतेसम्म निर्वाचनमा भाग लिन चाहने राजनीतिक दलले कार्यालयमा समयमा दर्ता गर्नुपर्नेछ ।
बुधबार नै सूचना निकालेलेर आयोगले उपनिर्वाचनमा भाग लिन चाहने राजनीतिक दललाई निर्धारित समयमा दल दर्ता गर्न आह्वान गरेको थियो ।
दर्ताका लागि राजनीतिक दलले निवेदन दिँदा राजनीतिक दल सम्बन्धी नियमावली, २०७४ को अनुसूची १२ बमोजिमको ढाँचामा आयोगको कार्यालयमा निवेदन दिनुपर्ने आयोगको सूचनामा उल्लेख छ ।
यसअघि नै आयोगमा दर्ता भएका ११९ वटा राजनीतिक दलले मात्र अहिले उपनिर्वाचनमा भाग लिन पाउने र उनीहरुले पुनः दर्ता गर्नुपर्ने आयोगले भनेको छ ।
सरकारले आगामी मंसिर १६ गते स्थानीय तहमा रिक्त रहेका ४१ पदका लागि उपनिर्वाचन गर्दै छ ।
जसमा जिल्ला समन्वय समितिका प्रमुख २, नगरपालिकाको प्रमुख र गाउपालिका अध्यक्ष ३, नगरपालिकाको उपमुख तथा गाउँपालिका उपाध्यक्ष ५, वडा अध्यक्ष ३१ गरेर स्थानीय तहमा ४१ पदमा उपनिर्वाचन हुन लागेको हो ।
