काठमाडौँ । भोजपुरको हतुवागढी गाउँपालिका र जिल्ला उद्योग वाणिज्य संघको आयोजनामा हतुवागढी महोत्सव हुने भएको छ ।
आगामी ३ कात्तिकदेखि सुरु हुने महोत्सव १७ कात्तिकसम्म संचालनहने गाउँपालिकाले जनाएको छ ।
स्थानीय जातजातिको संस्कार र संस्कृतिको प्रचारप्रसारका साथै पर्यटन प्रवद्र्धन गर्ने उद्देश्यले बृहत् हतुवागढी महोत्सव गर्न लागिएको गाउँपालिका अध्यक्ष प्रेमकुमार राईले जानकारी दिए ।
हतुवागढी गाउँपालिका तथा जिल्ला उद्योग वाणिज्य सङ्घको आयोजनामा हुने महोत्सवका लागि गाउँपालिकाले ३० लाख रुपैयाँ बजेट विनियोजन गरिएको अध्यक्ष राईले बताए ।
महोत्सवका क्रममा १५३ मिटर उचाइमा रहेको जिल्लाको सबैभन्दा होचोस्थल माइबेँनीबाट १ हजार ८६५ मिटर उचाइ रहेको सङखाम जोरआहाल हुँदै घोडेटार बजारसम्म २६ किलोमिटर दौड प्रतियोगिता हुनेछ ।
महोत्सवमा कृषिका साथै मारुनी, स्यामुना सिली, लाखे, हुर्रा, डम्फु नाच र वाद्यवादन यन्त्रको प्रदर्शनी हुने अध्यक्ष राई बताउँछन् ।
