भक्तपुर । भक्तपुर नगरपालिकाले २८ मंसिरदेखि २ पुससम्म भक्तपुर महोत्सव गर्ने भएको छ । नगरपालिकाले आयोजना गरेको भक्तपुर महोत्सव मूल समितिको छलफलमा समितिका अध्यक्ष एवं नगरपालिकाका प्रमुख सुनिल प्रजापतिले महोत्सवको तयारी सुरु भइसकेको बताए ।
कार्यक्रममा नगरप्रमुख प्रजापतिले भक्तपुर महोत्सव भक्तपुर नगरपालिकाको मात्र नभई सिङ्गो भक्तपुरका जनताको महोत्सव भएको बताए ।
प्रजापतिले भक्तपुर नगरपालिकाको आयोजनामा पाँचदिने भक्तपुर महोत्सव आयाजना गर्ने र यसले भक्तपुरको मौलिक एवं ऐतिहासिक कला, संस्कृति, जात्रा, पर्व, जीवनशैली अन्तर्राष्ट्रिय जगतमा प्रचार गर्न सहयोग पुग्ने दाबी गरे ।
भक्तपुर नगरवासीको आर्थिकोपार्जन गराउने उद्देश्य लिई विभिन्न पेसा र व्यवसायीलाई सहयोग हुने अपेक्षा गरिएको उनको भनाइ छ । कार्यक्रममा भक्तपुर नगरपालिकाका उपप्रमुख रजनी जोशी, प्रमुख जिल्ला अधिकारी रोशनीकुमारी श्रेष्ठ, भक्तपुरका प्रहरी उपरीक्षक माधवप्रसाद बुढाथोकीलगायतले भक्तपुर महोत्सवलाई शान्तिपूर्ण ढङ्गले सम्पन्न गर्नुपर्ने बताए ।
