काठमाडौँ । गत बुधबार प्रधानमन्त्री केपी शर्मा ओलीले आफ्नो नेतृत्वमा सरकार बनेको १०० दिनको अवधिमा भएका उपलब्धी सार्वजनिक गरे । 

नेपाली कांग्रेस र नेकपा एमाले जस्ता संसदका सबैभन्दा ठूला राजनीतिक दलहरुको गठबन्धन सरकारसँग संसदमा झण्डै दुईतिहाई बहुमत छ । प्रधानमन्त्री ओलीले सरकारको १०० दिनको उपलब्धी सार्वजनिक गर्नेक्रममा बलियो सरकार भएको र त्यसले आम जनतामा विश्वास जगाउने कार्य गरेको बताए ।

यस्तै, प्रधानमन्त्री ओलीले आफू नेतृत्वको सरकारले विकास निर्माणका कार्यलाई उच्च प्राथमिकता दिएको बताएका थिए । प्रधानमन्त्री ओलीले उनको सरकारले १०० दिनमा गरेका मुख्य उपलब्धी सार्वजनिक गर्दा बुधबार दिउसोको ३ बजिसकेको थियो ।

प्रधानमन्त्रीको सम्बोधन सुनिसकेपछि वडापालिकाको टिम प्रधानमन्त्रीले दाबी गरे जस्तै विकास निर्माणको गति कुन रुपमा अघि बढिरहेको रहेछ भने स्थलगत रिपोर्टिंगमा जाने निर्णयमा पुग्यो । यसका लागि हामीले संघीय राजधानी काठमाडौँसँग जोडिएको, धेरै मानिस दैनिक आवतजावत गरिरहने र रणनीतिक महत्वको सडक पनि भएकोले धुलिखेल-सूर्यविनायक सडकखण्डको काम कसरी भइरहेको छ भनेर भिडियो रिपोर्ट बनाउने निष्कर्ष निकाल्यौं ।

प्रधानमन्त्री ओलीको सम्बोधन सकिएपछि हामीले स्कुटरमा भक्तपुरको सूर्यविनायकदेखि काभ्रेपलाञ्चोकको धुलिखेलसम्मको भिडियो खिच्यौं । हामीले सो क्रममा करिब ५ वटा स्काभेटरले काम गरेको पायौं भने सडक विस्तारको काम ठप्प भएको पाइयो । सडक विस्तारका लागि बनाइएका खाल्डा पुरिएको थिएन । बाटो धुलाम्ये थियो । विजुलीका पोल नसार्दा सडक विस्तारमा समस्या भएको देखिन्थ्यो । 

बाँकी सो सडकखण्डमा के कस्तो काम भइरहेको थियो भनेर तपाईं आफै यो छोटो भिडियोमा हेर्न सक्नुहुन्छ ।