काठमाडौँ । फूलको पर्वको रुपमा चिनिने तिहार नजिकिँदै छ । आउँदो बुधबारबाट यमपञ्चक सुरु हुँदै छ भने आइतबार भाइटीका छ । यमपञ्चकदेखि भाइटीकासम्म फूल र फूलका मालाको प्रयोग गरिन्छ ।
तिहारमा प्लास्टिकको माला र फूलको प्रयोग नगर्न हालसम्म आधा दर्जन स्थानीय सरकारले आग्रह गरेका छन् । वातावरण र मानव स्वास्थ्यलाई नै प्लास्टिकले असर गर्ने भन्दै ती स्थानीय तहले प्लास्टिकका माला र फूल किनबेचमा प्रतिबन्ध लगाएका छन् ।
सार्वजनिक सूचना निकालेर तीन स्थानीय तहले प्लास्टिकमा माला र फूल प्रयोगमा प्रतिबन्ध लगाउँदै स्थानीय रुपमा उत्पादित फूलको प्रयोग गर्न आह्वान गरेका छन् ।
हालसम्म काठमाडौँको काठमाडौँ महानगरपालिका, रुपन्देहीको बुटवल उपमहानगरपालिका, अर्घाखाँचीको शितगंगा नगरपालिका, कपिलवस्तुको शिवराज नगरपालिका, कैलालीको भजनी नगरपालिका र मकवानपुरका थाहा नगरपालिकाले सार्वजनिक सूचना निकालेर प्लास्टिकका फूल र माला किनबेचमा रोक लगाएका हुन् ।
