काठमाडौँ । विगत केही महिनायता नेपाल प्रेस डटकम इन्टरनेट सेवा प्रदायक कम्पनी (आइएसपी) हरु विरुद्ध धारावाहिक रुपमा समाचार प्रकाशित गरिरहेको छ । आइएसपीहरुले राजस्व छली गरेर सरकार र जनता दुबैलाई ठगेको अभियोग नेपाल प्रेसले लगाइरहेको छ ।
नेपाल प्रेसमा यसरी धारावाहिक रुपमा समाचार आउनुको भित्री रहस्य भने फरक छ । नेपाल प्रेसको एक जना साहूको कम्पनीको ५१ प्रतिशत सेयर ७० करोड रुपैयाँमा खरिद गर्न नचाहेपछि नेपाल प्रेसलाई राजस्व छली भएको चिन्ता बढेको हो ।
नेपाल प्रेसमा ७ जना सेयरधनी छन् । तीमध्ये एक जना सेयरधनीसँग १६०० कित्ता सेयर छ भने बाँकी ६ जनासँग ६४०० कित्ताका दरले सेयर छ । त्यसमध्येका ६४०० कित्ताका सेयरधनी ध्रुव शर्माले मिडिया प्रयोग गरी व्यवसायिक ‘कोल्याब्रेसन’ गर्न चाहँदा नसकेपछि नेपाल प्रेस प्रयोग गरेको स्पष्ट हुन्छ ।
नेपाल प्रेस संचालक कम्पनीको नाम नेपाल इ. प्रेस मिडिया प्रालि हो । यो कम्पनीमा ध्रुव शर्माको ६४०० कित्ता सेयर छ । यद्यपि, अहिले नेपाल इ. प्रेस मिडिया प्रालिको अध्यक्ष विन्दुराज लम्साल छन् ।
नेपाल इ. प्रेस मिडियाको सेयरधनी ध्रुव शर्मा मेगा म्याक्स टिभी प्रालिको पनि सेयरधनी छन् । सो टिभीमा शर्माको ७ लाख ४० हजार कित्ता सेयर छ । मेगा म्याक्स टिभी प्रालिमा ध्रुव शर्मासहित १८ जना सेयर धनी छन् ।
यसरी जोडियो नेपाल प्रेस
नेपाल इ. प्रेस मिडियाको स्थापना २०७९ सालमा भएको हो । मेगा म्याक्स टिभी भने नेपाल प्रेस संचालनमा आउनु अघि नै दर्ता भइसकेको थियो ।
मेगा म्याक्स टिभी केबल टिभी हो । यसले पुरानो प्रविधिमा आधारित रहेर केबलमार्फत टेलिभिजन सेवा प्रदान गर्ने गरेको थियो । तर, सुचना प्रविधिको विकासले केबल टिभी छोटो समयमा नै फेज आउट भए । नेपालमा पनि केबल टेलिभिजनको व्यवसाय धरापमा पर्न थाल्यो ।
आफूले ठूलो लगानी गरेर संचालनमा ल्याएको मेगा म्याक्स टिभी लगानी नै नउठाइ धरासायी हुने अवस्था आएपछि सेयरधनी ध्रुव शर्माले सुविसु, भायनेट, डिसहोम, वल्र्डलिंक लगायतका आइएसपीसँग कोल्याब्रेसनको प्रस्ताव गरे । उनको प्रस्तावमा ती आइएसपीसँग मिलेर आइपिटिभी संचालन गर्ने भन्ने थियो ।
तर, फेजआउट भइसकेको केबल टिभीसँग कोल्याब्रेसन गर्न कुनै पनि आइएसपीहरु तयार भएनन् । आइएसपीहरु तयार नभएपछि ध्रुव शर्माले मिडिया (नेपाल प्रेस) को डर देखाएको एक आइएसपी संचालकले बताए । यद्यपि, ध्रुव शर्माले नेपाल प्रेस प्रयोग गरेर ठूला आइएसपीसँग कोल्याब्रेसनको प्रयास गरे पनि मेगा म्याक्स टिभी अहिलेसम्म सफल भने भएको छैन ।
७० करोडको प्रस्ताव नमानेपछि धारावाहिक समाचार
नेपाल प्रेस र मेगा म्याक्स टिभीका संचालक ध्रुव शर्माले सौदाबाजीको उपकरण नेपाल प्रेसलाई बनाइएका छन् । शर्माले आएएसपीहरुलाईलाई बुझाएको स्ट्राटेजिक कोल्याब्रेसनको प्रस्तावमा ५१ प्रतिशत सेयर किन्न भनिएको छ ।
मेगा म्याक्स टिभीको मूल्यांकन १ अर्ब ३७ करोड ४० लाख ९२ हजार रुपैयाँ गरिएको छ । ध्रुव शर्माले सो टिभीको ५१ प्रतिशत सेयर किनिदिन आइएसपीहरुलाई हारगुहार गरिरहेका छन् । उनले सो टिभीको ५१ प्रतिशत सेयर ७० करोड ७ लाख रुपैयाँमा किन्न प्रस्ताव गरेको र सो नमानेपछि विभिन्न आइएसपीहरु विरुद्ध नेपाल प्रेसमा धारावाहिक समाचार आएको तथ्यले प्रमाणित गरेको छ ।
