काठमाडौँ । चितवन महानगरपालिकामा महायोगी पायलट बाबाको ५ दिने आध्यात्मिक शिविर हुने भएको छ । हरिद्वारस्थित पायलट बाबा आश्रमका अनुसार ८ देखि १२ मसिरसम्म शिबिर संचालन गर्न लागिएको हो ।
एक सिरोर्टमा आयोजना हुन लागेको शिविरमा पायलट बाबाले आध्यात्मिक योग, विभिन्न यौगिक क्रिया र मुद्राध्यान विधि गराउनुका साथै योगको सूक्ष्म रहस्यबारे प्रवचन दिनेछन् ।
नेपालमा पहिलो पटक हुने पायलट बाबाको शिविर विभिन्न देशमा हुने गरेका छन् । शिविरमा ५० जना रशियन नागरिकका साथै जापान, अमेरिका, यूक्रेन, जर्मनी, इटली, टर्की,भारतलगायतका देशबाट योग सिक्न मानिसहरु आउने छन् ।
पायलट बाबाको नेपाल भ्रमणमा उनका शिष्याद्वय महामण्डलेश्वर योग माता चेतना, महामण्डलेश्वर योग माता श्रद्धाका साथै शिष्या सावित्री ऐमा लगायतका अन्य थुप्रैको सहभागिता हुने जनाइएको छ ।
बाबाको यस आध्यात्मिक शिविरका लागि भारत तथा नेपालमा कोर्डिनेशनको काम नेपाली पत्रकार ज्ञानमित्रले गरिरहेको आश्रमले जानकारी दिएको छ ।