काठमाडौँ । काठमाडौँ महानगरपालिकाले अनधिकृत प्रचार सामग्री टाँस्ने र वितरण गर्ने ३ जनालाई कलंकी क्षेत्रबाट नियन्त्रणमा लिएर जरिमाना तिराएको छ ।
विभिन्न पदमा रोजगारको अवसर, उल्लेख भएका पर्चामा भएको फोन नम्बर पछ्याउँदै रमेश खत्री, माधव पन्त र गणेश आचार्यलाई नियन्त्रणमा लिएर जरिमाना तिराइएको हो ।
नगर प्रहरी निरीक्षक प्रकाश पण्डित, नायव निरीक्षक राजकुमार चौलागाईँ र सहायक निरीक्षक प्रयास घिमिरेको टोलीले उनीहरुलाई पक्राउ गरेको हो । महानगरले सडक वा सडकका भित्ता, विजुलीका पोल, रेलिङ्, बार, पार्क, पर्खालजस्ता ठाउँहरुमा प्रचारका सामग्री टाँस्न रोक लगाएको छ ।
गणेश आचार्य एसवी जब सर्भिस लिंकसँग आवद्ध छन् । यो कम्पनीले मिति नराखी रिसेप्सनिष्ट, क्लिनर, सेक्युरिटी गार्ड, शिक्षक, ड्राइभर, वाइक होल्डर, हाउस किपिङ्जस्ता १६ शीर्षकका पदमा कर्मचारी अर्जेन्ट लेखेर पर्चा निकाल्ने गरेको छ ।
तलब कम्तीमा १० हजार बढीमा १६ हजारसम्म दिने भन्दै गरिएका विज्ञापनबाट पैसा असुल्दै आएको महानगरले जनाएको छ ।
