काठमाडौँ । अख्तियार दुरुपयोग अनुसन्धान आयोगले घुस लिएको आरोपमा पक्राउ परेका जिल्ला ट्राफिक प्रहरी कार्यालय रोल्पाका प्रमुख तथा प्रहरी नायव निरीक्षक (सई) ललितकुमार बुढाथोकीविरुद्ध भ्रष्टाचार मुद्दा दायर गरेको छ ।
अख्तियारले बिहीबार प्रहरी नायव निरीक्षक बुढाथोकीविरुद्ध भ्रष्टाचारको मुद्दा दर्ता गरेको अख्तियार प्रवक्ता नरहरि घिमिरेले जानकारी दिए ।
उनका अनुसार बुढाथोकीले सवारी साधनलाई आवत/जावत गर्न सहजीकरण गरिदिएवापत सेवाग्राहीसँग २५ हजार रुपैयाँ घुस लिएको पुष्टि भएकाले मुद्दा दर्ता गरिएको हो ।
घुस मागेको सूचना पाएपछि पुगेको अख्तियारको सम्पर्क कार्यालय नेपालगञ्जको टोलीले उनलाई सेवाग्राहीबाट २५ हजार रुपैयाँ घुस लिएको अवस्थामा पक्राउ गरेको थियो ।
प्रहरी नायव निरीक्षक बुढाथोकीविरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा २५ हजार बिगो मागदाबी गरेर मुद्दा दर्ता गरिएको छ ।
