काठमाडौँ । पूर्वगृहमन्त्री तथा रास्वपा सभापति रवि लामिछानेमाथि सहकारी ठगी, संगठित अपराध र सम्पत्ति शुद्धीकरण अभियोग लगाइएको छ । गत आइतबार जिल्ला सरकारी वकिलको कार्यालयले रविविरुद्ध कास्की जिल्ला अदालतमा उक्त अभियोगसहितको पत्र दर्ता गरेको छ ।
सरकारी वकिलको कार्यालयले रविसहित ४४ जनाविरुद्ध सहकारी ठगीसहित कसुरमा अभियोग दर्ता गरेको हो । सोमबारबाटै कास्की जिल्ला अदालतमा बयान सुरु भयो । तर, रवि लामिछानेको भने बिहीबारबाट बयान सुरु भएको हो । जिल्ला न्यायाधीश नीतिज राईको इजलासमा रविसहित प्रतिवादीको बयान भएको छ ।
बिहीबार आफूमाथिको अभियोगलाई अस्वीकार गर्दै बयान दिएका रवि शुक्रबार पनि सोही बयान दोहोर्याइरहेका छन् । आफूमाथि लगाइएको अभियोगमा इन्कारी बयान दिँदै राज्यले प्रतिशोध साँधेको बयान इजलासमा रवि दिइरहेका छन् ।
पोखराको सूर्यदर्शन सहकारीको रकम ठगी प्रकरणमा गत आइतबार रविसहित ४४ जनाविरुद्ध सहकारी ठगी, सम्पत्ति शुद्धीकरण र संगठित अपराध कसुरमा अभियोग दर्ता भएको थियो । सोमबारबाट प्रतिवादीहरुको बयान लिन सुरु गरिएको हो ।
प्रतिवादी छविलाल जोशी र लीला पछाइको बयान सकिएपछि बिहीबारदेखि रविको बयान सुरु भएको हो । सबै प्रतिवादीहरूको बयान सकिएपछि थुनछेकको बहस हुनेछ ।
