पर्सा । वीरगञ्ज महानगरपालिकाले बीपी उद्यान अतिक्रमण गरेर राखेको तरकारी तथा फलफूल पसल हटाउन उर्दी जारी गरेको छ ।

घण्टाघरचोकसँगै रहेको बिपी उद्यान अतिक्रमण गरेर तरकारी तथा फलफूल व्यापार गर्दै आएका व्यापारीलाई ७ दिनभित्र खाली गर्न महानगरले उर्दी जारी गरेको हो । यसअघि खाली गर्न दिएको निर्देशन नमानेपछि फेरि महानगरले ७ दिनको समय दिएर खाली गर्न भनेको हो । 

गत शुक्रबार दोस्रोपटक सार्वजनिक सूचना जारी गरेर वीरगञ्ज महानगरले ७ दिनभित्र घण्टाघरस्थित बीपी उद्यान हाताभित्र सञ्चालनमा रहेका तरकारी तथा फलफूल बजार खाली गर्नका लागि आह्वान गरिएको हो । 

यसअघि गत मंसिर २६ गते १५ दिने सार्वजनिक सूचना जारी गरेर बीपी उद्यानमा राखिएका तरकारी तथा फलफूल बजार हटाउनका लागि निर्देशन दिएको थियो । सो म्याद पनि पुस १० गते सकिएपछि दोस्रोपटक खाली गर्न आह्वान गरिएको हो । 

वीरगञ्जको मुख्य स्थानमा रहेको अस्तव्यस्त बजारले यहाँको सौन्दर्यीकरणमा समेत समस्या पार्दै आइरहेको छ ।