कास्की । पोखराको सूर्यदर्शन सहकारी ठगीसहित कसुरमा अभियोग लागेका प्रतिवादीको बयान सकिएसँगै थुनछेक बहस सुरु भएको छ ।
यही पुस ७ गते सहकारीको रकम ठगी प्रकरणमा सरकारी वकिलको कार्यालयले पूर्वगृहमन्त्री तथा रास्वपा सभापति रवि लामिछानेसहित ४४ जनाविरुद्ध सहकारी ठगीसहित कसुरमा अभियोग दर्ता गरेको थियो । रविसहित केहीमाथि प्रतिवादीमाथि सहकारी ठगी, संगठित अपराध र सम्पत्ति शुद्धीकरण अभियोग लगाइएको छ ।
पुस ८ गतेबाट कास्की जिल्ला अदालतका न्यायाधीश नीतिज राईको एकल इजलासमा प्रतिवादीको बयान सकिएसँगै थुनछेक बहस सुरु भएको हो । थुनछेक बहस सकिएपछि अदालतले प्रतिवादीलाई पुर्पक्षका लागि थुनामा पठाउने वा धरौटीमा रिहा गर्ने वा साधारण तारेखमा रिहा गर्ने भन्ने आदेश दिनेछ ।
थुनछेक बहसमा सरकारी वकिल र सहकारी पीडितका कानुन व्यवसायीले अभियुक्तहरूलाई थुनामा राखेर मुद्दा अघि बढाउनुपर्ने बहस गर्नेछन् भने प्रतिवादीका तर्फबाट वकालत गर्ने कानुन व्यवसायीहरूले प्रतिवादीलाई धरौटी वा तारेखमा छाडेर मुद्दा अघि बढाउन पाउनुपर्ने माग गर्नेछन् ।
