सुनसरी । धरान उपमहानगरपालिकाले ‘धरान डे’ अवसरमा रस्सी तान र छेलो हान्ने प्रतियोगिताको आयोजना गरेको छ ।
१२४औँ धरान ड (धरान दिवस)को अवसरमा पुस २३ गते मंगलबार महिला र पुरुषको रस्सी तान र छेलो हान्ने प्रतियोगिता आयोजना गरिएको उपमहानगरको शिक्षा महाशाखा प्रमुख गणेशप्रसाद खतिवडाले जानकारी दिए ।
उनका अनुसार पुस २३ गते मध्यान्ह १२ बजेदेखि ६ बजेसम्म हुने प्रतियोगितामा सहभागी हुन चाहनेले सोही दिनको बिहान १० बजेभित्र खेलाडी र टिम दर्ता गरिसक्नुपर्नेछ ।
रस्सी तान प्रतियोगितामा २ जना वैकल्पिकसहित ९/९ जना खेलाडी हुनुपर्नेछ भने छेलो हान्ने प्रतियोगितामा एक एकजना खेलाडी बीच प्रतिस्पर्धा हुनेछ ।
रस्सी तान प्रतियोगितामा विजेतालाई ८ वटा लोकल कुखुराको भाले र उपविजेतालाई ६ वटा लोकल कुखुराको भाले पुरस्कार स्वरुप दिइने प्रमुख खतिवडाले जनाए ।
उनका अनुसार छेलो हान्ने प्रतियोगिताको पुरस्कार विजेता खेलाडीले ३ वटा भाले र उपविजेता खेलाडीले २ वटा भाले पाउनेछन् ।
