काठमाडौँ । गण्डकी प्रदेशका ८८ वटै स्थानीय तहका प्रमुख प्रशासकीय अधिकृतहरुसँग संघीय मामिला तथा सामान्य प्रशासन मन्त्रालयले असल अभ्यास लगायतका विषयमा छलफल गर्ने भएको छ ।
२२ र २३ पुसमा पोखराको लेकसाइडस्थित एक होटलमा ८८ वटै स्थानीय तहका प्रमुख प्रशासकीय अधिकृतहरुलाई बोलाएर मन्त्री राजकुमार गुप्ता स्वयंले स्थानीय तहका असल अभ्यासका विषयमा छलफल गर्न लागेको मन्त्रालयको भनाइ छ ।
कार्यक्रम अवधिभर खाना र बस्ने व्यवस्था मन्त्रालयले नै व्यहोर्ने यो कार्यक्रममा गत आर्थिक वर्षमा सम्पन्न गरेका कार्यक्रमहरुको समीक्षा, असल अभ्यास सम्बन्धमा अनुभव तथा सिकाइको आदानप्रदान लगायतका विषयमा छलफल हुने मन्त्रालयका सहसचिव कालीप्रसाद पराजुलीले जानकारी दिए ।
उनका अनुसार मन्त्री र सचिवसमेत सहभागी हुने कार्यक्रममा हरेक स्थानीय तहले आफ्ना अनुभव र प्रगतिविवरणका विषयमा १० मिनेटको प्रस्तुतिकरण पेश गर्ने कार्यक्रम छ ।
