काठमाडौँ । नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल प्रचण्डले स्थानीय तहमा छायाँ सरकार बनाउनुपर्ने प्रस्ताव गरेका छन् । 

आइतबारबाट जारी पार्टीको केन्द्रीय समिति बैठक अध्यक्ष प्रचण्डले पेस गरेको राजनीतिक प्रतिवेदनमा माओवादी नेतृत्वदायी भूमिका नरहेका स्थानीय तहमा छायाँ सरकार बनाउने प्रस्ताव गरेका हुन् । 

देशभर ७५३ स्थानीय तह छन् । मोरङको ग्रामथानसहित १२३ स्थानीय तहमा माओवादी नेतृत्वको सरकार रहेको भन्दै प्रचण्डले बाँकी ६३० मा छायाँ सरकार बनाउन प्रस्ताव गरेका हुन् । 

‘संघीय र प्रादेशिक सरकारबाट बाहिरिएपछि हाम्रो पार्टीसँग उपचुनावमा विजयी बनेको मोरङको ग्रामथानसमेत १२३ स्थानीय सरकारको नेतृत्व रहेको छ । त्यसबाहेक कतिपयमा उपाध्यक्ष वा उपप्रमुख सहित हाम्रो बहुमत छ भने कतिपयमा हाम्रा केही प्रतिनिधिहरू छन् । हाम्रो नेतृत्व वा कुनै एक पदाधिकारीसहित बहुमत नभएको स्थानमा वा हामी अत्यन्त कम संख्यामा निर्वाचित भएको वा निर्वाचित नै हुन नसकेको स्थानमा पनि हाम्रो योजनाबद्ध भूमिका रहनुपर्छ । त्यहाँ अर्को ५ वर्ष सम्मको लागि हेरेर र कुरेर बस्नु हाम्रो कर्तव्य हुन सक्दैन,’ प्रचण्डले आफ्नो राजनीति प्रतिवेदनमा प्रस्ताव गरेका छन्, ‘त्यस्ता पालिकाहरूमा स्थानीय पार्टीले छायाँ सरकारको अवधारणाअन्तर्गत योजनाबद्ध रूपमा जनतासँग जोडिएका जनसेवा, सुधार र विकासका कामहरू गर्नुपर्छ ।’