काठमाडौँ । सहकारीको रकम ठगी अभियोग लागेका रास्वपा सभापति रवि लामिछाने आइतबार काठमाडौँ जिल्ला अदालतमा उपस्थित भएका छन् ।
गत बिहीबार कास्कीस्थित पोखराको सूर्यदर्शन सहकारीको रकम ठगीसहितको अभियोगमा ६५ लाख धरौटी बुझाएर रिहा भएका उनी आइतबार काठमाडौँ जिल्ला अदालतमा उपस्थित भएका हुन् । शुक्रबार नै काठमाडौँ जिल्ला अदालतमा उपस्थित हुने भनिए पनि आइतबारमात्र अदालत गएका हुन् ।
कालीमाटीको स्वर्णलक्ष्मी सहकारी संस्थाको रकम ठगी गरेको अभियोगमा काठमाडौँ जिल्ला अदालतमा उनीविरुद्ध मुद्दा दर्ता भएको छ । सोही कारण उनी बयान दिन अदालतमा उपस्थित भएका हुन् ।
अब के हुन्छ ?
स्वर्णलक्ष्मी सहकारी संस्थाको रकम ठगी गरेको अभियोग लागेका रास्वपा सभापति रवि लामिछानेले आइतबार काठमाडौँ जिल्ला अदालतमा बयान दिनेछन् । बयानपछि थुनछेक बहस हुनेछ । वादी र प्रतिवादी दुवै पक्षको बहस भइसकेपछि मात्र रविलाई पुर्पक्षका लागि कारागार चलान गर्ने वा धरौटीमा छाड्ने वा साधारण तारेखमा छाड्ने भन्ने आदेश अदालतले दिनेछ ।
आइतबार यी सबै प्रक्रिया पूरा नभएमा अदालतले आदेश नआउँदासम्मका लागि उनलाई न्यायिक हिरासतमा राख्न अनुमति दिनेछ । साथै, अदालतमा आफैँ उपस्थित हुने शर्तमा कसैको जिम्मामा छोड्न पनि सक्ने कानुन व्यवसायीको भनाइ छ ।
तर, रविका कानुन व्यवसायीहरु भने आइतबार बयान र थुनछेक बहस सकेर अदालतको आदेश आउने गरी तयारी गरिरहेका छन् ।
