काठमाडौँ । सहकारी ठगी अभियोग लागेका रास्वपा सभापति रवि लामिछानेको पक्षमा बहस गर्न वकालतनामा लेखाएका २० कानुन व्यवसायी इजलासमा उपस्थित भइसकेका छन् ।
कालीमाटीको स्वर्णलक्ष्मी सहकारीको रकम अपचलनको अभियोग लागेका रवि आइतबार बयानका लागि काठमाडौँ जिल्ला अदालतमा उपस्थित भएका छन् । न्यायाधीश माधवप्रसाद अधिकारीको एकल इजलासमा रविको बयान भइरहेको छ । उनको बयान सकिएपछि थुनछेक बहस हुनेछ ।
यसका लागि दिउँसो १ बजेसम्ममा २० कानुन व्यवसायीले रविको पक्षमा बहस गर्न वकालतनामा लेखाउँदै अदालतमा उपस्थित भइसकेका छन् । रविको पक्षमा बहस गर्न वरिष्ठ अधिवक्ता तथा पूर्वमहान्यायाधीवक्ताहरू सुशील कुमार पन्त, रमणकुमार श्रेष्ठ, वरिष्ठ अधिवक्ता डा. नारायण घिमिरे, अधिवक्ताहरू डा. नारायण कँडेल, यज्ञमणि न्यौपाने, सुदीज्ञ पन्त, हरिचन्द्र भट्टराई, टीका ढकाल, गणेश शर्मा, मनिषा गौतम, मधु चौलागाईंलगायतका वकिलले वकालतनामा लेखाएका हुन् ।
वादी र प्रतिवादीको बहसपछि मात्र अदालतले रविलाई पुर्पक्षका लागि थुनामा पठाउने वा धरौटीमा छाड्ने वा साधारण तारेखमा रिहा गर्ने भन्ने आदेश दिनेछ । तर, वादी र प्रतिवादीको पक्षमा बहस गर्ने वकिलको संख्या धेरै भएमा आइतबार आदेश आउने सम्भावना कम देखिन्छ ।
वादी पक्षबाट पनि कानुन व्यवसायी थप्ने तयारी गरेका छन् । यसर्थ आइतबार नै आदेश आउने सम्भावना कम देखिएको छ ।
स्वर्णलक्ष्मीबाट रवि प्रवन्ध निर्देशक रहेको गोर्खा मिडिया नेटवर्कमा कानुनविपरीत ५ करोड ७८ लाख ९८ हजार ४८० रुपैयाँ गएको प्रहरी अनुसन्धानले देखाएको छ । रविसहित ३९ जनाविरुद्ध जिल्ला सरकारी वकिलको कार्यालय काठमाडौँले गत आइतबार पुस २१ गते अभियोगपत्र दर्ता गरेको थियो
गत बिहीबार कास्की जिल्ला अदालतका न्यायाधीश नीतिज राईको इजलासले सहकारीको रकम ठगीसहितको अभियोग लागेका रविसहित ७ प्रतिवादीलाई धरौटीमा रिहा गर्न आदेश दिएको थियो । रविले ६५ लाख धरौटी बुझाएर बिहीबार रिहा भएका थिए ।
काठमाडौँ जिल्ला अदालतका आफैँ उपस्थित हुने शर्तमा कास्कीबाट रिहा भएका रवि आइतबार अदालतमा उपस्थित भएका हुन् ।
