काठमाडौँ । काठमाडौँ जिल्ला अदालतले सहकारी ठगी अभियोग लागेका रास्वपा सभापति रवि लामिछानेलाई प्रहरीको जिम्मा लगाउन आदेश दिएको छ ।
कालीमाटीको स्वर्णलक्ष्मी सहकारीको रकम अपचलनको अभियोग लागेका उनी आइतबार बिहान कार्यालय समयअगावै अदालतम उपस्थित भएका थिए । आइतबार न्यायाधीश माधवप्रसाद अधिकारीको एकल इजलासले रविलाई सोमबार पुनः अदालत उपस्थित गराउने गरी प्रहरीको जिम्मा लगाउने आदेश दिएको हो ।
आदेशसँगै रवि प्रहरीको न्यायिक हिरासतमा पुगेका छन् । गत बिहीबार कास्की जिल्ला अदालतका न्यायाधीश नीतिज राईको एकल इजलासले पोखराको सूर्यदर्शन सहकारीको रकम ठगीसहितको अभियोगमा ६५ लाख धरौटीमा रविलाई रिहा गर्न आदेश दिएकोे थियो । सोही आदेशपछि काठमाडौँ जिल्ला अदालतमा आफैँ उपस्थित हुने शर्तबमोजिम ६५ लाख धरौटी बुझाएर बिहीबार रिहा भएका रविलाई आइतबार पुनः प्रहरीको न्यायिक हिरासतमा पठाउन आदेश भएको हो ।
गत आइतबार (२१ पुस)मा जिल्ला सरकारी वकिलको कार्यालय काठमाडौँले रविसहित ३९ जनाविरुद्ध ठगी अभियोगमा काठमाडौँ जिल्ला अदालतमा मुद्दा दर्ता गरेको थियो ।
आइतबार अदालतमा उपस्थित भएका रविको न्यायाधीश अधिकारीको इजलासमा बयान भएको छ । बयान सकिएपछि थुनछेक बहस भएको थियो । तर, बहस नसकिएकाले मुद्दालाई हेर्दाहेर्दैमा राख्दै न्यायाधीश अधिकारीले रविलाई प्रहरीको हिरासतमा राख्न आदेश भएको हो । सोमबार पुनः उनलाई अदालतमा उपस्थित गराइनेछ भने थुनछेक बहस चल्नेछ ।
