काठमाडौँ । भोजपुर नगरपालिकाका मेयर कैलाशकुमार आले भोजपुर जिल्ला बुद्धिचाल सङ्घद्वारा आयोजित प्रथम भोजपुर जिल्ला बुद्धिचाल प्रतियोगिताको च्याम्पियन बनेका छन् ।
भोजपुर उद्योग वाणिज्य सङ्घको सभाहलमा भएको खेलमा शतप्रतिशत जित दर्ता गर्दै भोजपुर नगरपालिका–७ निवासी मेयर आले च्याम्पियन बनेका हुन् ।
आलेले हेमा राई, राजकुमार राई, सङ्ग्राम राई, टीकाराम राई, उमेश मगर, नारायण तामाङ र प्रदीपकुमार राईलाई पराजित गरे ।
यस्तै पाँच जित, एक बराबरी र एक हारको नतिजा निकालेका आमचोक गाउँपालिकाका उमेश मगर दोस्रो भए । मगर च्याम्पियन बन्न सफल आलेसँग पाँचाँै चरणमा पराजित ।
समान पाँच अङ्क जोड्न सफल भोजपुर नगरपालिका वडा नं ६, देउरालीका नारायण तामाङ, टेम्केमैयुङ गाउँपालिका ८, गोगनेका भगतकुमार राई, भोजपुर नगरपालिका ५ का प्रदीपकुमार राई र टेम्केमैयुङ गाउँपालिका १ तिम्माका टीकाराम राई क्रमशः तेस्रोदेखि छैटौँ भए ।
प्रतियोगिताको विधागत पुरस्कारतर्फ टेम्केमैयुङ गाउँपालिका १, तिम्माकी सन्तोषी राई महिला प्रथम भइन् भने भोजपुर नगरपालिका ७ भोटेपसलका संस्कार राई अन्डर १५ टपको पुरस्कार जित्न सफल भए ।
