काठमाडौँ । वढीमालिका नगरपालिका ४ स्थायी घर भएका राजेन्द्र नाथ यतिवेला हजुरवुवाको किरिया बारेर बसेका छन् । बाबुको मृत्यु भइसकेको अवस्थामा हजुवुवाको पनि मृत्यु भएपछि किरिया बस्नुपर्ने दायित्व उनमा आइलाग्यो । 

शोकमा भएका बेला यता शुक्रवार संघीय मामिला तथा सामान्य प्रशासन मन्त्रालयले एउटा निर्णय गर्यो– निमित्त प्रमुख प्रशासकीय अधिकृतलाई दिइएको आर्थिक र प्रशासनिक अधिकार खोस्ने । 

यही निर्णयका कारण बाजुराको बुढीगंगा नगरपालिकाका निमित्त प्रमुख प्रशासकीय अधिकृत नाथको आर्थिक र प्रशासनिक अधिकार खोसिएको छ । 

उनको अधिकार खोसिएसँगै अब नगरपालिकामा प्रशासकीय अधिकृतको जिम्मेवारी दिने कर्मचारीसमेत अभाव देखिएको मेयर राम र बानियाँ बताउँछन् । 

२०६७ सालदेखि यो नगरपालिकामा कार्यरत नाथलाई २०७९ साउनबाट निमित्त प्रमुख प्रशासकीय अधिकृतको जिम्मेवारी दिइएको थियो । पालिकामा उनीभन्दा वरिष्ठ कर्मचारी नभएकै कारण नाथलाई जिम्मेवारी दिइएको तर संघीय मामिलाले निमित्त हटाउने नाममा नसोधी हटाएको भन्दै मेयर दुखेसो पोख्छन् । 

मेयरका अनुसार हाल १० मध्ये ६ वटा वडामा वडासचिवसमेत छैनन् । भएका कर्मचारीको काज सरुवा गरिदिने तर उपसचिवको दरवन्दी भएको नगरपालिकामा अधिकृतसमेत नपठाइदिने संघ र प्रदेशको रवैयाका कारण जनताका काममा समस्या भएको उनको गुनासो छ । 

कर्मचारीको चरम अभाव भएको बेला भएका एक जना अधिकृतको अधिकार समेत खोसेपछि दरबन्दी अनुसारको उपसचिव तत्काल उपलव्ध गराइदिन मेयर बानियाँको माग छ । 

यता मन्त्रालयका प्रवक्ता कालीप्रसाद पराजुली भने वरिष्ठ कर्मचारी हुँदाहुँदै कनिष्ठलाई निमित्त दिने पालिकाका हाकिमहरुको मात्र अधिकार खोसिउको बताए । तर मनत्रालयले अधिकार खोस्ने नाममा सम्वन्धित पालिकाका प्रमुखले प्रत्यायोजन गर्ने प्रशासनिक अधिकारसमेत संघले नै खोसेको परिपत्र गरेर संघीयताको मर्ममाथि प्रहार गरेको जनप्रतिनिधिको गुनासो छ ।